Sot pas 23 viteve i mbijetuari i masakrës së Çikatovës së Vjetër, Naim Makolli, rrëfen për tmerrin e asaj dite.
“Kanë gjuajtur para afër një rafall, gjysmë rafalli në tokë prej nervozes së grave e fëmijëve që kanë bërtit, kurse tjetrin gjysmë rafall e kanë gjuajt përmi neve”.
I plagosur, Makolli eci rrugës së fshatit. Ai arriti deri tek shkolla, nga ku forcat serbe gjuajtën sërish në drejtim të tij, por ai shpëtoi mrekullisht.
“Kam pas dhimbje të madhe, kam pas gjakderdhje shumë, nuk kam mujtë as plagën ta lidhi. Kanë ardhë forcat serbe përpjetë, unë kam mbet ratë aty gjoja që jam i vdekur, deri kanë kalu. Kam qëndrua nja pesë minuta ratë, tani kam vazhdu me gra e fëmijë atje poshtë”.
E në mesin e këtij grupi ishte edhe anëtari i familjes Morina, Shqipron Morina
“Pasi ka ndodhë masakra, unë e kam parë babën tim të ndjerë në atë kohën duke ndërru jetë, pastaj neve na kanë marrë dhe na kanë dërgu vetëm gratë dhe fëmijët. Krejt ato që i maj mend janë masakrat dhe kujtime shumë të këqija, që kam pasur dhe vazhdoj të kem problem t’i harroj. Edhe më mungon shumë t’i kem disa çaste të mira me prindin tim”, thotë ai.
Mirëpo trupat e të vrarëve u gjetën vetëm në vitin 2015, në Rashkë të Serbisë.
Haki Morina, banor i fshatit Çikatovë e Vjetër, thotë se serbët synuan të zhdukin gjurmët e luftës.
Në fshatin Çikatovë të vjetër u vranë 24 civilë, e për këtë akt kriminal ende nuk është ndëshkuar askush nga drejtësia.
Kronika e realizuar nga Albiona Hajdari
