Rasim Gjinofci, njëri nga minatorët e ngujuar dje në Trepçë, ka rrëfyer me shkrim për emisionin “Ditari” në Tëvë1 atë se çfarë kanë kaluar dje gjatë kohës sa kanë qenë të ngujuar dhe deri sa kanë arritur të dalin.
Ai, në përgjigjen e tij me shkrim, tha se kanë qenë shumë të lodhur dhe se u janë dashur për çdo horizont nga katër orë për të dalë në sipërfaqen e Tokës.
“Kemi pasur shumë lodhje. Për çdo horizont na janë dashur 4 orë derisa kemi dalë në sipërfaqë të tokës. Ujë dhe ushqim kemi pasur me vete, por na është dashur t’i lëmë në horizontin 11”, tha ai në përgjigjen e tij me shkrim.
Ai më tej tregon se të ngujuar kanë qenë edhe një person me mbipeshë dhe një tjetër me dy stenda në zemër.
“Ka qenë një person me mbipeshë, i cili ka ecur ngadalë, dhe një tjetër me dy stenda në zemër. Disa kanë mbetur që nuk kanë besuar se do të arrijnë të dalin lart”, shpjegoi tutje ai.
Tutje, në rrëfimin e tij, të cilin e dërgoi me shkrim, ai tha se kushtet janë mjeruese dhe se për të kjo është hera e dytë që ndodh një situatë e tillë.
“Kushtet janë mjeruese, mjetet janë të stërvjetruara, por puna po vazhdon falë vullnetit të stafit tonë. Është hera e dytë që ndodh kjo, të paktën për mua”, përfundon Gjinovci rrëfimin e tij.
Gjatë ditës së djeshme 63 minatorë mbetën të ngujuar në horizontet e minierës së Trepçës për disa orë me radhë. Ata nga miniera ishin nxjerrur pas mesnate.
Kjo ka ndodhur si pasojë e një prishje, ku më pas është ndërprerë energjia elektrike për dy njësi edhe për flotacion edhe për njësinë e Stantergut në minierë.
