I burgosuri palestinez, Shadi Abu Seed ka dhënë një rrëfim të tmerrshëm të jetës për Al Jazeera-n, për përjetimet e tij brenda një burgu izraelit pas lirimit të tij si pjesë e marrëveshjes së armëpushimit.
“Kam qenë i uritur për dy vitet e fundit. Betohem në Zot, nuk na kanë ushqyer. Na kanë mbajtur lakuriq. Na kanë rrahur ndërsa ishim lakuriq ditë e natë. Na kanë torturuar”, tha Abu Seed.
“Deri ditën e fundit në burgun izraelit, ata na prenë, na goditën dhe na keqtrajtuan. Ne duruam çdo lloj torture, emocionale dhe fizike.
“Nuk mund të flinim dot as gjumë. Na kërcënuan me fëmijët tanë. Më thanë se i vranë fëmijët e mi. Na thanë se Gaza ishte shkatërruar. Arrita këtu dhe pashë se gjithçka ishte zhdukur. Duket si fundi i botës. Gjithçka është ndryshe.”
Një tjetër i paraburgosur i liruar së fundmi i cilësoi burgjet izraelite si “burgje padrejtësie”.
Ai i tha korrespondentit të Al Jazeera-s, Tariq Abu Azzoum, se shumica e të burgosurve palestinezë në burgjet izraelite torturohen më shumë se një herë në ditë.
Të burgosurit u qëlluan nga trupat izraelite me plumba të veshur me gome dhe për shkak të kësaj ai kishte “plagë të thella rreth pjesëve intime dhe shpinës”. Shumë të burgosur u goditën gjithashtu me rrymë, shtoi ai.
“Na mbajtën në një thertore.”
Duke folur në Spitalin Nasser në Khan Younis në Gazën jugore pasi u lirua, ai tha se palestinezët e Gazës mbeten “të guximshëm dhe të palëkundur”.
“Kemi sakrifikuar shumë, por sakrificat tona janë shumë të pakta në krahasim me të tjerët”, tha burri.
Ai falënderoi “Zotin, popullin palestinez dhe luftëtarët e rezistencës në Gaza” për lirimin e tij.
Hamasi ka liruar të 20 robërit e gjallë që mbaheshin në Rripin e Gazës dhe thotë se do të dorëzojë trupat e katër të tjerëve më vonë sot.
Lirimi i rreth 2,000 të burgosurve dhe të paraburgosurve palestinezë nga Izraeli është në proces, me 154 prej tyre të dërguar në Egjipt dhe të detyruar në mërgim .
