Policët që ishin në orar pune natën e 24 shtatorit dhanë detaje për Tëvë1 se si ndodhi i tërë sulmi në Banjskl. Derisa rruga Ballaban – Banjskë e Zveçanit u përurua sot me emrin e heroit, Afrim Bunjaku.
Kolona ishte e gjatë.
Kjo pasi në magjistralen Mitrovicë – Leposaviq krerët e shtetit u nisën për në Banjskë të Zveçanit, aty ku para një viti ra heroikisht rreshteri Afrim Bunjaku.
E pikërisht atje u vendos tabela rrugore që mban emrin e tij.
Përurimin e asaj tabele e bënë shefi i ekzekutivit me ministra e familjarë të heroit të Republikës.
Kryeministri Kurti nga Banjska bëri thirrje që përgjegjësit e sulmit të dalin para drejtësisë në Kosovë.
“Policia e Kosovës është multietnike, ajo ju shërben të gjithë qytetarëve, por kriminelët e llojit të Radojiciqit, Veselenoviqit, dhe të ngjajshmëve nuk mund të fitojnë nuk mund të jenë të lirë në Kosovën demokratike të pavarur dhe Evropiane. Ata fitojnë tenderë, ata sillën lirë në Serbinë autokratike pro ruse. Përgjegjëse është Serbia, andaj Serbia duhet të mbajë përgjegjësi dhe për këtë ne kërkojmë ndihmën e faktorëve evropian dhe amerikan të perëndimit demokratik sepse Millan Radojiçiq dhe kriminelët e tjerë, duhet t’i dorëzohen Policisë së Kosovës”, tha Kurti.
E si kishte ndodhur sulmi tregoi kolegu i Afrim Bunjakut.
“Ne ishim duke u kthyer nga fshati Rudine ku e kishim pikën atje, në kontrolle të vazhdueshme. Në ato momente kur kemi ardhë këtu kemi hasur në dy kamiona që kanë qenë këtu të parkuar. E kemi ditë që diçka nuk është duke funksionuar dhe e kemi paraqitur rastin te dhoma komanduese pastaj janë kryer veprimet tona”, tha polici Mirsad Kryeziu.
Polici Mirad Kryeziu tha se Bunjakun kanë arritur ta largojnë nga vendi ku ndodhi sulmi.
“Kemi arrit t’i bëjmë të gjitha lëvizjet tona që Afrimi të mos mbetet këtu dhe ashtu ja kemi dalë. Normalisht është plagosur edhe kolegu Albani gjatë asaj ofensive mirëpo ata nuk kanë arritë asnjëherë që t’i zbatojnë dhe t’i kontrollojnë ato planet e veta që i kanë pasur kundër neve”, tha Kryeziu.
Për herë të pari, u deklarua edhe polici i plagosur gjatë ballafaqimit me terroristët serbë.
Alban Rashiti sot ndihet krenar për reagimin në mbrojtje të shtetit.
“Sot bëhen 1 vit prej rastit që e kemi pas ku ra heroikisht, kolegu ynë ka humbur jetën, ka qenë siç e përshkruajti kolegu. Ka qenë ditë normale, mbrëmje normale kemi pa që është diçka e parregullt, bllokim i kamionëve aty kanë fillu sulmet, janë ato përkujtimet që na kthejnë në kohë, por gjithçka vazhdon, kjo është puna jonë. Besoj është kthyer në krenari” , tha polici i plagosur në Banjskë, Alban Rashiti.
Në të njëjtën ditë, familjarë dhe qytetarë serbë, bënë homazhe në vendin ku Policia e Kosovës vrau tre terroristët serbë.
