Një përleshje masive ka ndodhur në orët e para të mëngjesit në një kafene në Vërbovac të Kllokotit, pas një mosmarrëveshjeje mes disa personave.
Përmes raportit ditor, Policia ka bërë të ditur se të përfshirë kanë qenë shtatë persona, dy prej të cilëve zyrtarë policorë, por jashtë detyrës zyrtare në momentin e incidentit.
Në vendin e ngjarjes, policia ka arrestuar tre prej të dyshuarve, të cilët ishin nën ndikimin e alkoolit, ndërsa dy të dyshuarit tjerë janë larguar dhe janë ende në kërkim nga autoritetet.
Për rastin është njoftuar Inspektorati Policor i Kosovës dhe prokurori kujdestar, i cili ka urdhëruar që pas intervistimit, tre të arrestuarit të lirohen në procedurë të rregullt.
“Pas një mosmarrëveshjeje në një lokal- kafe ka ndodhur një rrahja masive, ku janë përfshi pesë të dyshuar m/k dhe dy viktima m/k zyrtar policor jashtë detyrës zyrtare. Viktimat kanë pranuar tretman mjekësor, ndërsa në vendin të ngjarjes janë arrestuar tre të dyshuarit të cilët ishin nën ndikim të alkoolit, ndërsa dy të dyshuarit tjerë janë larguar nga vendi i ngjarjes. Lidhur me rastin është informuar Inspektorati i policisë dhe prokurori kujdestar i cili ka urdhëruar që pas intervistimi tre të dyshuarit të lirohen. Rasti nën hetime”, thuhet në raportin e Policisë.
