Cristiano Ronaldo është treguar i ashpër me Manchester Unitedin dhe trajnerin holandez Ten Hag. Ylli luzitan në një intervistë për të pazakontë për “talkSPORT”, ka rrëfyer shumë të pathëna në prag të Botërorit “Katar 2022”.
Pa përdorur asnjë lloj diplomacie, Ronaldo u hodh në sulm frontal ndaj klubit të tij, duke paralajmëruar në këtë mënyrë largimin në janar:
“Manchester United më tradhtoi,nuk kam fare respekt për Ten Hag, sepse ai nuk tregoi respekt për mua. Klubi u përpoq të më detyronte të largohesha. Këtë e bëri jo vetëm trajneri, por të gjithë drejtuesit e klubit. U ndjeva i tradhtuar. Ndjej se disa njerëz nuk më duan më tek United, nuk më kanë dashur as sezonin e kaluar. U bëra “delja e zezë” dhe ata nuk me dërguan asnjë mesazh edhe kur vajza ime ishte e sëmurë”, tha Ronaldo.
Ronaldo më pas foli për zgjedhjen e tij për t’u rikthyer në United, derisa dëgjoi me plot vëmendje ish-trajnerin e tij të mëparshëm Sir Alex Ferguson:
“Klubi nuk u përmirësua pasi u largua Fergusoni. Kur vendosa të kthehesha këtu, ndoqa zemrën time. Sir Alex më tha se nuk do të ishte e pranueshme për mua që të shkoja në City. Dhe Unë i thashë “ok, shef”, përfundoi Ronaldo.
Me pak fjalë, Ronaldo ka zgjedhur rrugën për t’i dhënë fund marrëdhënieve me “Djajtë e Kuq”. Tani pritet vetëm reagimi i klubit.
