Ambasadori gjerman në Kosovë, Jorn Rofde, thotë se autorët e sulmit terrorist të 24 shtatorit në Banjskë janë në kërkim, dhe se të njëjtit duhet të dalin para drejtësisë.
Rohde tha se nuk mund të pranohet në parim mosndëshkimi i Millan Radoiçiqit, i cili vetë ka marrë përgjegjësinë e sulmit.
“Banjska ndryshoi gjithçka. Ishte një sulm terrorist. Këta nuk ishin qytetarë të pakënaqur, por kishin raketahedhës, automatikë, granata… Jemi ende në kërkim të autorëve të dyshuar që duhet të dalin para drejtësisë. Vetë Milan Radoiçiq tha se është përgjegjës, por ende nuk ka përgjegjësi, nuk mund të pranojmë parimin e mosndëshkimit. Nëse kryen një krim, duhet të gjykohesh”, ka thënë ambasadori në një intervistë për mediumin serb “Kosovo-online”.
Tutje, ai është shprehur se personalisht nuk do ta imagjinonte një sulm të tillë, andaj sipas tij edhe për këtë arsye NATO ka shtuar praninë e saj.
Rohde bëri të ditur se edhe Gjermania do ta bëjë të njëjtën, ku në muajin maj pritet të vijë një kontigjent i ri.
“Shpresojmë se Serbia është duke punuar në këtë. Personalisht, nuk mund ta imagjinoja se do të ndodhte diçka e tillë, dhe për këtë arsye NATO e shtoi praninë e saj dhe Gjermania do të bëjë të njëjtën gjë me një kontingjent të ri nga maji. Ajo që duam është paqe dhe stabilitet. Sulmet si ky janë saktësisht e kundërta e kësaj. Nëse nuk dënohen autorët e sulmit në Banjskë, si mund të rritet besimi mes dy vendeve. Kjo ishte një punë e madhe dhe me të vërtetë autorët duhet të ndëshkohen”, deklaroi ai.
Ndërkohë, aktualisht në Kosovë janë 85 ushtarë gjermanë. NATO njoftoi kohë më parë për një rritje të trupave të saj të KFOR-it pas rritjes së tensioneve midis Serbisë dhe Kosovës.
