Ministrja në detyrë e Ekonomisë, Artane Rizavnolli ka njoftuar se të enjten është mbajtur edhe një takim ndërmjet bizneseve dhe kompanive që kanë licencë për furnizim me energji dhe Zyrës së Rregullatorit të Energjisë.
Ajo ka bërë të ditur se 5 nga kompanitë që kanë licencë si furnizues të energjisë paraqitet ofertat e tyre.
“Disa prej tyre tashmë kanë dhënë oferta për biznese individuale ose kontrata me grupe biznesesh të organizuara së bashku, ndërsa një prej tyre tashmë ka nënshkruar kontrata me biznese ose grupe biznesesh të organizuara së bashku. Kompanitë kryesisht planifikojnë të ofrojnë kontrata komerciale variabile (në bazë të kostove të tregut plus një marzhë të furnizuesit për shërbimin e ofruar), ndërsa 3 prej tyre janë të gatshëm të ofrojnë edhe kontrata me çmim fiks. Disa furnizues theksuan se nëse bizneset organizohen në grupe për të negociuar e nënshkruar kontrata me ta, ata mund të përfitojnë nga çmimet më të lira. Furnizuesit njoftuan se bursat prej nga furnizohen dallojnë mes tyre, dhe përfshijnë ALPEX, HUPX, etj”, ka shkruar ajo në Facebook.
Rizvanolli u ka bërë thirrje bizneseve që janë pjesë e fazës së dytë të liberalizimit të tregut që të organizohen sa më parë për të arritur deri tek ofertat më të favorshme.
Ajo ka kërkuar edhe nga Zyra e Rregullatorit të Energjisë të lehtësojë sa më shumë procesin e informimit në kohë me të dhënat e domosdoshme për bizneset dhe furnizuesit.
