Gjatë seancës së sotme në Kuvendin e Kosovës, ministrja e Ekonomisë, Artane Rizvanolli, ka thënë se KEK-u nuk ka blerë asnjëherë nga kompania GEN e Serbisë gjatë periudhës së Qeverisë Kurti.
Ndaj kritikave të opozitës ajo është përgjigjur duke thënë se masat emergjente me energji kanë pasur efektin e tyre.
Rizvanolli i ka quajtur mit deklaratat që masat emergjente nuk kanë pasur.
“Miti që masat emergjente nuk kanë pasur efekt po i them vetëm dy gjëra për këtë, e para ndalimi i eksportit të peletit pas ndalimit të eksportit çmimi është ulur nga 750 euro për ton në 300 euro për ton, do te thotë kemi pasur 60% ulje, kjo ka qenë masa e vetme të cilën kemi mundur ta ndërmarrim sepse ju e keni dërguar në gjykatë kushtetuese ligjin i cili do të mundësonte vendosjen e çmimit tavan”, ka deklaruar ajo.
Ndërsa, sa i përket kriptovalutave ajo ka treguar se janë shkatërruar 8 ferma të kriptovalutave, janë konfiskuar mbi 600 pajisje ilegale, që sipas saj, i kursejnë qytetarëve miliona euro në vit.
“Janë shkatërruar tetë ferma të kriptovaluatave në veri, janë konfiskuar mbi 600 pajisje ilegale që i kursejnë qytetarëve miliona euro në vit dhe nga kjo dhe luftimi i aktiviteteve të tjera ilegale në veri, për herë të parë kemi ulje të konsumit në veri përderisa në vitet e kaluara ka pasur 8 deri 12% rritje çdo vit”, ka thënë ajo.
