Ministrja në detyrë e Ekonomisë, Artane Rizvanolli i ka propozuar Zyrës së Rregullatorit për Energji (ZRRE) që për konsumatorët që harxhojnë më pak se 800 kWh, të mos ketë rritje të çmimit të rrymës për sivjet.
Rizvanolli propozon që konsumatorët e tjerë, të cilët shpenzojnë mbi 800 kilovat orë energji, rritja të jetë “sa më e ulët”.
“Në lidhje me tarifat e energjisë elektrike, ne i kemi propozuar ZRRE-së që të mos ketë fare rritje për konsumatorët të cilët konsumojnë deri në 800 kWh në muaj, ndërsa për të tjerët, rritja të jetë sa më e ulët dhe ata konsumatorë të ndahen në sa më shumë kategori ose blloqe”, tha ministrja në detyrë e Ekonomisë, Rizvanolli.
Artane Rizvanolli thekson po ashtu se konsumatorët duhet të trajtohen në bazë të asaj që shpenzojnë për energji elektrike.
“Në këtë mënyrë të mos trajtohet njëjtë për shembull, sikur dikush që shpenzon 1000 kWh në muaj sikur dikush që shpenzon 3000 kWh në muaj. Në këtë mënyrë, ne mbrojmë familjet sa më shumë që të jetë e mundur pa e cenuar sigurinë e furnizimit dhe veçanërisht mbrojmë ata të cilët kanë nevojë më së shumti”, ka deklaruar Rizvanolli.
Më 11 prill pritet të miratohen tarifat e reja të energjisë elektrike.
Paralajmërimi i ZRrE-së për ngritje të çmimit të energjisë elektrike për 15% ka shkaktuar pakënaqësi të madhe te qytetarët dhe bizneset. Të shtunën është mbajtur një protestë, përmes të cilës është kërkuar rritja e energjisë elektrike. Ndërsa, një protestë e radhët është paralajmëruar edhe këtë të premte.
