Korporata Energjetike e Kosovës do të eksportojë në Maqedoninë e Veriut thëngjill në vlerë deri në 73,2 milionë euro gjatë tre vjetëve, ka bërë të ditur ministrja në detyrë e Ekonomisë, Artane Rizvanolli.
Sipas saj, kjo është hera e parë që kontrata lidhet drejtpërdrejt ndërmjet dy kompanive publike – KEK-ut dhe Elektranave të Maqedonisë së Veriut (ESM).
“Çmimi prej 24,4 eurosh për ton, pa TVSH, është shumëfish më i favorshëm për KEK-un në krahasim me kontratat e kaluara që bëheshin përmes ndërmjetësuesve”, ka thënë ajo përmes një videomesazhi në Facebook.
Ajo ka thënë se gjatë eksportit të fundit në Maqedoninë e Veriut, KEK-u e kishte shitur thëngjillin për vetëm tetë euro për ton, përfshirë tantiemën prej tri eurosh dhe tatimin mbi vlerën e shtuar prej 18 për qind.
Sipas ministres, ai tender kishte qenë i jashtëligjshëm.
Rizvanolli ka siguruar se kontrata e re nuk do të ndikojë në prodhimin e energjisë elektrike në Kosovë.
“Prodhimi i energjisë elektrike në Kosovë nuk ndikohet në asnjë mënyrë nga kjo kontratë, duke qenë se ESM-ja është përgjegjëse për ekskavimin dhe transportin e thëngjillit që do ta blejë”, ka deklaruar ajo.
