Ministrja e Ekonomisë, Artane Rizvanolli, ka reaguar në seancën e Kuvendit të Kosovës, duke mohuar akuzat e opozitës për lidhje të qeverisë me kompani që tregtojnë energji elektrike.
Rizvanolli tha se rritja e çmimit të rrymës gjatë viteve të fundit ka ndodhur brenda një konteksti të krizës globale, duke përmendur edhe investimet në Korporata Energjetike e Kosovës (KEK) dhe ndërprerjen e Bllokut 2 për modernizim të turbinës, që uli prodhimin për katër muaj e gjysmë. Ajo theksoi gjithashtu se kërkesa për rritje nga Zyra e Rregullatorit për Energji (ZRrE) është ende duke u shqyrtuar dhe se qeveria do të japë komentet e saj pasi të përfundojë raporti.
Deputeti i LDK, Armend Zemaj, i kërkoi Rizvanollit sqarime për pretendime se qeveria ka lidhje me kompani të energjisë, duke përmendur ish-zyrtarin Nagip Krasniqi dhe çështjet e tij ligjore. Zemaj akuzoi se disa kompani kanë përfituar miliona për energji dhe pyeti ministren nëse qeveria mbulon keqpërdorimet.
“Për të ardhur keq, kur del një ministre ose duhet të ketë zor të madh, është arrestuar Nagip Krasniqi, edhe akoma është me aktakuzë aktive nga Prokuroria Speciale për keqpërdorim të tenderëve. A mundesh të mohosh që ka tërhequr miliona Martin Berishaj? Pse e mbron një person që është me aktakuzë, me proces gjyqësor aktiv? Çfarë lidhje ke ti me to”, e pyeti Zemaj, Rizvanollin.
Rizvanolli reagoi duke theksuar se qeveria dhe anëtarët e LVV nuk kanë asnjë lidhje me kompanitë që tregtojnë energji elektrike. Ajo e cilësoi si të pavërteta pretendimin se ekzistojnë lidhje midis qeverisë dhe kompanive, duke shtuar se këto akuza nuk kanë bazë dhe janë keqinformuese. /teve1.info/
