Rita Ora ka thyer heshtjen pasi një këngë intime, e dedikuar bashkëshortit të saj Taika Waititi, ka qarkulluar papritur në internet pa asnjë paralajmërim.
Bëhet fjalë për “Tokyo Karaoke”, një këngë personale që ka ngjallur menjëherë reagime të forta mes fansave.
Artistja 35-vjeçare kishte lënë të kuptohej vetëm pak javë më parë se albumi i saj i katërt pritet të publikohet gjatë këtij viti, duke ndarë në rrjete sociale një shënim të shkruar me dorë me fjalët “album 4”, të shoqëruar me mesazhin optimist: “2026 do të jetë një vit i mirë”.
“Tokyo Karaoke” përmban vargje të frymëzuara nga udhëtimi i Ritës në Japoni, vendi ku lindi edhe historia e dashurisë mes saj dhe regjisorit 50-vjeçar.
Sipas mediave britanike, kënga ishte menduar fillimisht për albumin e saj të tretë “You & I”, por përfundimisht nuk u përfshi në versionin final.
Teksti i këngës flet hapur për pasiguri personale, dashuri të thellë dhe mbështetje emocionale, elemente që fansat i kanë cilësuar si ndër më të sinqertat në karrierën e saj.
Disa nga vargjet kanë tërhequr vëmendje të veçantë në rrjet, duke u shpërndarë gjerësisht.
Reagimi i Ritës erdhi përmes Instagramit, ku ajo publikoi një ‘screenshot’ nga një faqe fansash që kishte shpërndarë linkun e këngës.
Me një ton sportiv dhe pa polemika, këngëtarja u drejtua ndjekësve:
“Me sa duket, “publikimet pa leje” ende ekzistojnë. Fatmirësisht, kjo është një këngë që e dua shumë. Kështu që shijojeni. Faleminderit atij që e ka publikuar”
Ky episod vjen në një periudhë kur Rita Ora ka folur më hapur se kurrë për jetën e saj personale dhe familjare.
Ajo ka rrëfyer se përvoja e të qenit njerkë e vajzave të Taika Waititit ka qenë një “hapje e madhe sysh” dhe i ka ndryshuar mënyrën se si e sheh jetën.
Pas martesës së tyre në vitin 2022, Rita u bë pjesë aktive e jetës së dy vajzave të regjisorit, 13 dhe 9 vjeçe, duke e përshkruar këtë rol si të thjeshtë, por jashtëzakonisht domethënës.
Sipas saj, rutina familjare dhe koha e kaluar së bashku i kanë dhënë një perspektivë krejt tjetër për atë që ka vërtet rëndësi.
Rita Ora dhe Taika Waititi nisën lidhjen e tyre romantike në fillim të vitit 2021, ndërsa disa muaj më vonë u shfaqën publikisht si çift.
Përpara se dashuria të merrte formë, ata kishin qenë miq të ngushtë për disa vite, një lidhje që, siç duket, sot po reflektohet edhe në muzikën e saj më personale.
