Ditë më parë, kryeministri i Malit të Zi, Dritan Abazoviq deklaroi se demarkacioni është çështje e mbyllur. Por, ndryshe nga ai mendon presidenti malazez, Milo Gjukanoviq, i cili tha në Prishtinë se me anë të komisionit të përbashkët do të krijojnë kushte për korrigjimet e nevojshme të kufirit.
“Jam i sigurt që do t’i përmbahemi dokumenteve që kemi nënshkruar dhe se përmes punës së komisionit të përbashkët për demarkacion do të krijojmë kushtet e domosdoshme për korrigjime për të cilat do të pajtohemi që do të kontribuojë që ky kufi në demarkacionin e tij të jetë i logjikshëm dhe të jetë ashtu siç duhet të jetë dhe të mos shërbejë si burim i mosmarrëveshjeve dhe rrezikimit të marrëdhënieve tona”, tha Gjukaniviq.
Këtë deklaratë të Gjukanoviqit, po e cilëson si pozitive ish-anëtar i Komisionit për shënjimin e kufirit shtetëror Florim Isufi, i cili thotë se tani çështja e kufirit ka mbetur në mirëbesimin e palëve.
E ish-anëtari tjetër i komisionit për shënimin e kufirit Hamit Basholli, thotë se procedimit tutje i kësaj çështje, tani ka mbetur në vullnetin politik në mes të dy vendeve.
Më 21 mars 2018, Kuvendi i Kosovës pati miratuar Demarkacionin me Malin e Zi, pavarësisht kundërshtimeve të atëhershme. Por, që atëherë, Kosova dhe Mali i Zi ende nuk e kanë krijuar komisionin e përbashkët për ri-shënjimin e vijës kufitare, si një prej pikave të marrëveshjes.
Raporti i gazetarit Valmir Gallopeni.
