Riparimi i kanalit të Ibër –Lepecit kushtoi 370 mijë euro, lëshohet për qarkullim.
Përgatitjet e fundit po bëhen.
Pas pak momenteve, uji do të rikthehet edhe një herë për qarkullim, në kanalin kryesor të Ibër-Lepencit në Zubin Potok.
Kjo pasi 46 ditë më parë, bandat kriminale serbe pas një sulmi terrorist, dëmtuan këtë kanal.
E momenti i pritur, erdhi në orën 10 të paradites të së martës.
Në këtë formë edhe një herë uji filloi të qarkullojë pa pengesa në këtë kanal.
38 ditë pasi uji kaloi në bypass, mëngjesin e së martës u kthye përsëri për qarkullim në kanalin kryesor të Ibër Lepencit këtu në Varragë të Zubin Potokut.
E i lumtur më këtë, u shpreh i pari i Zubin Potokut, Izmir Zeqiri.
“Kanë arritur në afatet e caktuara të lëshohet uji, edhe pse unaza e by-passit e ka bërë furnizimin e duhur me ujë edhe për ekonomitë familjare po edhe për ftohjen e turbinave në Korporatën Energjetike të Kosovës”, u shprehe ai.
E në Varragë të martën u pa edhe kryeshefi i Ibër-Lepencit, Faruk Mujka.
Ky tha se ndërtimi i kanalit përfundoi para Vitit të Ri.
Ndërsa shpjegoi se pse kishte rrjedhje të ujit para se kanali të lëshohej përsëri në përdorim.
“Ne i kemi lënë vet, ka qenë zgjidhje teknike, që uji të mos depërtoj në pjesën e rindërtuar, i kemi hapur dy zgavra që uji të rrjedh poshtë, të mos e dëmtoj betonin e sapondërtuar dhe izolimin, kjo ka qenë arsyeja pse ka pas një rrjedhje të vogël, por ajo tani është rregulluar”, tha kryeshi i Ibër –Lepencit, Faruk Mujka.
Mujka ka treguar se sa është kosto e sanimit të dëmit nga sulmi i 29 nëntorit të vitit 2024.
“Komplet edhe riparimi, por edhe kthimi në gjendjen e mëparshme ka kushtuar afër 370 mijë euro”, u shpreh Mujka.
Në fund, Mujka ka shtuar se Bypassi i hapur me 7 dhjetor të vitit të kaluar, do të mbyllet dhe do të hapet përsëri rruga për qarkullim nën kanalin e Ibër Lepencit.
