Rinia Demokratike e Kosovës ka organizuar të shtunën një aksion simbolik para selisë së Qeverisë së Kosovës, në shenjë kundërshtimi ndaj rritjes së tarifave të energjisë elektrike dhe faturave të larta të rrymës që, sipas tyre, po rëndojnë gjithnjë e më shumë buxhetet familjare.
Nga RDK-ja u tha se ky aksion ka për qëllim të tërheqë vëmendjen e institucioneve ndaj pasojave të krizës energjetike, e cila po ndikon drejtpërdrejt në jetën e përditshme të qytetarëve, veçanërisht të familjeve me të ardhura të ulëta dhe të të rinjve.
Në deklaratat e bëra gjatë protestës, përfaqësuesit e RDK-së theksuan se faturat e energjisë po bëhen të papërballueshme, duke shtuar se shumë familje po përballen me zgjedhje të vështira mes shpenzimeve bazike si ngrohja dhe ushqimi, ndërsa studentët, sipas tyre, detyrohen të studiojnë në kushte të papërshtatshme për shkak të kostove të larta të energjisë.
RDK-ja ka drejtuar kritika të drejtpërdrejta ndaj kryeministrit në detyrë, Albin Kurti, duke e akuzuar se me deklaratat e tij po minimizon problemet reale të qytetarëve dhe po shmang përgjegjësinë institucionale për situatën energjetike në vend.
Ndërkohë, kompania KESCO ka paralajmëruar se gjatë këtij viti ka kërkuar rritje të çmimit të energjisë elektrike për 21.3 për qind.
