Sulmuesi i krahut, Francisco Conceicao do të jetë i gatshëm për ta ndihmuar Juventusin në ndeshjen e këtij vikendi kundër Genoas në kuadër të Serie A.
Portugezi është rikuperuar nga lëndimi që e pësoi para tri javësh dhe tashmë është bashkuar me grupin në stërvitje.
Kështu që, trajneri Thiago Motta do ta përfshijë Conceicaon për duelin në udhëtim kundër Genoas që luhet të shtunën prej orës 18:00 dhe i takon xhiros së 6-t të kampionatit italian.
Conceicao dëmtoi muskulin e këmbës në debutimin e tij te Juventusi, ndeshjen kundër Romës, e cila përfundoi pa gola.
21-vjeçari konsiderohet si lojtar i rëndësishëm nga trajneri Motta, i cili kundër Genoas nuk do ta ketë në dispozicion amerikanin Timothy Weah.
Juventusi ndaj Genoas futet pas tri barazimeve pa gola në kampionat dhe aktualisht zë vendin e katërt në Serie A me 9 pikë të mbledhura, dy më pak se Interi që është lider.
