Fushata zgjedhore në Serbi ka rikthyer gjuhën problematike të disa prej krerëve më të lartë të këtij shteti. Cak i sulmeve dhe retorikës së ashpër nga dikur bashkëpunëtorët e Sllobodan Millosheviqit, ishte Kosova dhe Mali i Zi. Për këtë, nga Lëvizja Vetëvendosje po kërkojnë ndërhyrje të BE-së, derisa në Mal të Zi ka nisur një peticion për ndalimin e retorikës së nxitë tensione në Ballkan.
Fushata zgjedhore në Serbi, i ka rikthyer personazhet e vjetra që kohë pas kohe maskoheshin si demokratë dhe pro-perëndimor.
Dikur bashkëpunëtorë të afërm të kasapit të Ballkanit, Sllobodan Millosheviq, tani krerë më të lartë të Serbisë, e kanë rikthyer retorikën e dikurshme kur i shërbenin shefit të tyre.
Aleksandër Vuciq, Vojslav Sheshel dhe Aleksandër Vulin – të tre politikanë me peshë në shtetin serb, kanë dhënë deklarata problematike në një ditë të vetme.
Kryeministri i shtetit serb, të dielën teksa po fliste para elektoratit, tha se Kosova ka qenë, është dhe do të mbetet gjithmonë pjesë e Serbisë.
Hic më keq nuk e la edhe shërbëtori i tij, Aleksandër Vulin, i cili deri para pak jave udhëhiqte shërbimin informativ të Serbisë.
Ai po e lavdon presidentin serb, duke i dhënë merita që s’po e njeh pavarësinë e Kosovës dhe nuk po i vendos sanksione Rusisë.
“Ata që sulmojnë Vuçiqin se do ta njohë Kosovën, që s’e ka njohur qe 12 vite, dhe që do të vendosë sanksione ndaj Rusisë, që s’e ka bërë qe 2 vite, do ta njihnin Kosovën dhe do të vendosnin sanksione ndaj Rusisë pa menduar dy here”, tha Aleksandër Vulin, ish-shef i BIA-s.
Problematike si deklarata, e të rrezikshme për sigurinë në Ballkan, po shihen nga ana e institucioneve të vendit.
Deputeti i Lëvizjes Vetëvendosje, Alban Bajrami, thotë se kjo çasje e shtetit fqinj duhet të ndalet dhe për këtë po kërkon ndërhyrje të partnerëve ndërkombëtarë.
Por, Kosova nuk ishte cak i vetëm i këtyre deklaratave nga politikanë të Serbisë.
Vojslav Sheshel, i dënuar për krime lufte, i cili së fundmi u “rehabilitua” nga presidenti i Serbisë, Aleksandar Vuçiq, duke e ftuar për t’iu bashkuar koalicionit qeverisës para zgjedhjeve të ardhshme, botoi libra të shumtë me fyerje ndaj personaliteteve të ndryshme të politikës në Mal të Zi.
Bile, për këtë gjë është nisur një peticion në Mal të Zi, ku i kërkohet kryediplomatit Filip Ivanoviq, që të dërgojë notë proteste ndaj institucioneve të Serbisë.
Arton Rama
