Formati i ri i Ligës së Kampionëve rikthehet me xhiron e tretë të stinorit të rregullt, që do të zhvillohet të martën dhe të mërkurën, ku do të luhen në total 18 ndeshje gjatë këtyre dy ditëve.
Megjithatë, të martën prej nëntë ndeshjeve në program, vëmendja do të jetë në Madrid, saktësisht në stadiumin “Santiago Bernabeu” prej orës 21:00.
Real Madridi do të përballet me Borussia Dortmundin, ekip që këtë sezon nuk di për humbje në Ligën e Kampionëve.
Në fakt, këto dy skuadra para 5 muajve u patën përballur në finalen e sezonit të shkuar në Londër, të cilën e fitoi Real Madridi për t’u kurorëzuar për herën e 15-të kampion i Evropës.
Aktualisht, Dortmundi i prinë grupit me 6 pikë të mbledhura pas dy ndeshjeve, ku ka shënuar 10 gola dhe ka pranuar vetëm 1. Kështu që, Dortmundi kërkon edhe fitoren e tretë rresht në Champions.
Në anën tjetër, Real Madridi ka 1 fitore dhe 1 humbje, ndërsa ndaj Dortmundit do të synoj pikët e plota për të reaguar pas disfatës nga Lille në xhiron e shkuar.
Po ashtu, fitorja ndaj Dortmundit do ta motivonte Real Madridit në prag të “El Clasicos” që do të luhet të shtunën mbrëma në Barcelonë.
Fitoren e tretë në po aq ndeshje në Ligën e Kampionëve, do ta kërkoj edhe Juventusi që në Torino e pret Stuttgartin dhe vlerësohet favorit përball ekipit gjerman, i cili ka vetëm 1 pikë.
Edhe kjo ndeshje starton prej orës 21:00, orar në të cilin do të zhvillohen edhe pesë përballje tjera: Arsenal – Shakhtar Donetsk, Aston Villa – Bologna, Girona – Slovan Bratislava, PSG – PSV Eindhoven dhe Sturm Graz – Sportingu i Lisbonës.
Mbrëmja e Championsit nis prej orës 18:45, me ndeshjen Milan – Club Brugge dhe Monaco – Cërvena Zvezda.
