Nedim Bajrami është rikthyer këtë fundjavë në fushë për Rangers, duke veshur sërish fanellën e ekipit skocez pas një periudhe mungese për shkak dëmtimi.
Mesfushori kuqezi luajti përsëri me ekipin e tij pas problemit muskulor që e detyroi të largohej shumë herët nga loja në ndeshjen ndaj Kilmarnok, më 6 dhjetor, ku kishte nisur si titullar, por u zëvendësua pas vetëm rreth 21 minutash në fushë.
Rikthimi i Bajramit përbën një lajm pozitiv edhe për Kombëtaren shqiptare, në prag të angazhimeve të radhës, megjithatë situata e tij te Rangers mbetet ende e paqartë.
Klubi skocez vazhdon ta ketë në plan largimin e mesfushorit gjatë merkatos së janarit, duke e konsideruar shitjen e tij si një opsion konkret, për shkak të hapësirave të kufizuara në ekip dhe minutazhit të ulët që ai ka pasur këtë sezon.
Bajrami është përfshirë në listën e lojtarëve që mund të lejohen të largohen, së bashku me Nsiala, Matondo dhe Danilo, teksa drejtuesit e klubit pritet të shqyrtojnë ofertat e mundshme që mund të mbërrijnë gjatë muajit janar.
Ndërkohë, edhe pse klubet kanë të drejtë të bëjnë ndryshime në listën zyrtare të UEFA-s gjatë merkatos dimërore, deri tani Rangers nuk e ka përfshirë mesfushorin shqiptar në këtë listë.
Megjithatë, nëse Bajrami vendos të qëndrojë në skuadër dhe të luftojë për një vend, nuk përjashtohet mundësia që ai të regjistrohet për fazën e ardhshme të kompeticioneve europiane.
