Njoftimi është bërë i ditur nga Shërbimi Spitalor Klinik dhe Universitar i Kosovës.
“Nga dita e sotme ( e hënë, 18 korrik 2022), është rikthyer në punë Shërbimi i Radioterapisë- Akseleratori për Rrezatim, po ashtu, Shërbimi i Brahiterapisë, Ct- Stimulatori dhe Mozaiku, në kuadër të Klinikës së Onkologjisë në QKUK. Rikthimi i këtyre shërbimeve është bërë, pas përpjejekjeve maksimale nga stafi i Klinikës së Onkologjisë, Sektori Teknik i QKUK-së dhe kompania që ka nën mirëmbajtje dhe servisim aparaturat mjekësore”, thuhet në njoftim.
Në këtë klinikë ishin ndërprerë shërbimet pas vërshimit nga uji javë më parë.
Pacientët e Kosovës ishin dërguar në Shqipëri për trajtim, për të cilën gjë SHSKUK ka shprehur falënderim.
“ShSKUK falënderon Ministrinë e Shëndetësisë së Republikës së Shqipërisë, e cila ka qenë në kontakt të vazhdueshëm me Ministrinë e Shëndetësisë së Republikës së Kosovës për situatën e krijuar, dhe ka shprehur gatishmërinë për të ndihmuar pacientët kosovarë, që kanë pasur nevojë për Shërbimin e Radioterapisë”./teve1.info/
