Manchester City ka lëshuar pikët më të rëndësishme këtë sezon në Premier League, duke luajtur baras ndaj West Ham. Skuadra e Pep Guardiola nuk arriti më shumë sesa një barazim 2:2 në një ndeshje ku mund të shkonte ndryshe nëse Riyad Mahrez do të ishte më i saktë nga pika e bardhë.
Liderët e Premier League e gjeten veten në disavantazh në minutën e 24’, kur Bowen shënoi për 1:0.
I njëjti lojtar shënoi edhe një herë në fundin e pjesës së parë, për të çuar shifrat në 2:0 dhe për t’i hapur telashe të mëdha ‘Citizens’.
Megjithatë, mysafirët nuk ishin dorëzuar. Lufta për titull ishte aty. Ata reaguan në minutën e 49’ me anë të Jack Grealish, i cili ngushtoi epërsinë në 2:1.
20 minuta më vonë, Manchester City shënoi për 2:2 me autogolin e Coufal. City shtoi presionin edhe më shumë dhe kërkoi golin e fitores. Në minutën e 85’, Gabriel Jesus fitoi një penallti por atë mundësi të artë e humbi Riyad Mahrez, i cili gaboi. Më saktë, Fabianski priti penalltinë e tij.
Manchester City shkon tashmë në 90 pikë, katër më shumë sesa Liverpool. Liverpool ka një ndeshje për të luajtur dhe nëse e fitojnë atë ndeshje, gjithçka do të vendoset në xhiron e fundit. West Ham shkon në 56 pikë. Manchester City xhiron e fundit e luan në ‘Etihad’ kundër Aston Villa.
