Rrjeti i Bizneseve të Diasporës Shqiptare në Itali, RIDA Italia, ka njoftuar organizimin e forumit ekonomik “Ponti d’Impresa – Ura Ekonomike Itali–Shqipëri”, i cili do të mbahet më 12 dhjetor 2025 në Hotel Kolombo në Romë.
Sipas Koordinatorit Ndërkombëtar të RIDA Italia, Jeton Krasniqi, forumi do të mbledhë së bashku përfaqësues institucionalë, sipërmarrës, profesorë dhe ekonomistë nga Italia, Shqipëria dhe Kosova, me qëllim forcimin e bashkëpunimit ekonomik ndërmjet vendeve.
“Ky forum synon të krijojë ura të reja bashkëpunimi dhe të nxisë sinergji të reja tregtare mes bizneseve shqiptare dhe italiane. Pjesëmarrja është falas për të gjitha bizneset, mjafton një regjistrim paraprak,” theksoi Krasniqi në njoftim.
Fokus i veçantë në ekonominë qarkore
Pjesëmarrësit do të diskutojnë për mundësitë reale të zgjerimit të bashkëpunimit ekonomik, rritjen e investimeve dypalëshe si dhe potencialin që ofron ekonomia qarkore për zhvillim të qëndrueshëm.
Sipas organizatorëve, forumi është një mundësi e rëndësishme për ndërmarrjet shqiptare dhe ato italiane që kërkojnë partneritete të reja, shkëmbim ekspertize dhe zgjerim të prezencës së tyre në tregjet e të dy vendeve.
Thirrje për media dhe biznese
RIDA Italia ka ftuar mediat që të mbulojnë eventin përmes artikujve, intervistave apo promovimit të aktivitetit në portalet e tyre.
“Do të ishim shumë të lumtur nëse mediat shqiptare do të dëshironin të shkruanin një artikull, të realizonin intervistë ose të promovonin forumin. Qëllimi ynë është të informojmë dhe të përfshijmë sa më shumë aktorë të interesuar,” u shpreh Krasniqi.
Ai shtoi se është në dispozicion për çdo informacion shtesë, duke falënderuar për vëmendjen dhe mbështetjen.
