Më 7 gusht me mijëra qytetarë mbuluan sheshin e Prishtinës, duke protestuar kundër Gjykatës Speciale.
Po në të njëjtën ditë reagoi edhe kryeministri shqiptar Edi Rama, përmes një statusi në rrjetin social facebook.
Rama u shpreh i habitur që akoma nuk është ngritur një rezolutë në Kuvendin e Kosovës, për shkeljet që po bëhen sipas tij nga Gjykata Speciale.
Ai tutje tha se të njëjtën rezolutë do ta mbështeste dhe Shqipëria.
Deputeti i Kuvendit të Kosovës, Nait Hasani, vlerëson se kohë më parë do të duhej të nxirrej një rezolutë e tillë meqë siç thotë ai, procesi i gjykimit në Hagë ka devijuar.
“Edi Rama e ka përmendur këtë çështje në Kuvendin e Kosovës, por një rezolutë e tillë nuk është ngritur gjatë mandatit të kaluar. Aktualisht, Kuvendi ende nuk është konstituuar, por sapo të ndodhë kjo, do të marrim iniciativën për ta paraqitur rezolutën, pasi në Hagë po bëhen shumë padrejtësi, ku po pranohen dosje nga Serbia”, tha deputeti Nait Hasani.
Nga ana tjetër, profesori Mazllum Baraliu thotë se Shqipëria ka mundësi ta ngrejë rezolutën pa e pritur Kuvendin e Kosovës.
“Do të duhej që pikërisht Kuvendi i Shqipërisë ta miratonte një rezolutë të tillë, meqë ne ende nuk kemi një Kuvend funksional. Më pas, pasi të konstituohej Kuvendi, edhe Kosova do të ndërmerrte të njëjtin veprim”, tha Baraliu.
Katër ish-krerët e UÇK-së ndodhen në paraburgim në Hagë që nga nëntori i vitit 2020.
Qëndrimi për pesë vjet në paraburgim shpesh është cilësuar si shkelje e të drejtave të njeriut nga veteranët në Kosovë.
