Rexhep Ciriku nga Prizreni tash e 58 vite ushtron profesionin e floktarit.
Por pavarësisht faktit se ai tashmë është në pension, ai thotë që do të punojë deri në ditën e fundit të jetës së tij.
Ciriku në Tëvë1, rrëfeu dashurinë e tij për profesionin e floktarit, teksa tregoi se që nga mosha 10 – vjeçare ka vendosur të zgjedhë këtë profesion.
“E du profesionin edhe klientët i respektoj shumë, se klienti është qelsi i lokalit, ai ta mbyllë lokalin ai ta qelë lokalin. E për qata myshterija është i shenjtë, duhet me e respektu dhe jom mundu sa më mirë me kalu me njerëz, megjithëse jam tash në pension qe tre vite. Por prap punoj edhe deri në ditën e fundit ka me punu sa të më ecin këmbët, kur s’mundem me ecë atëherë normal që duhet me e lënë, edhe ulur punoj deri sa të muj, kur s’muj atëherë duhet me e lanë. E du profesionin shpirtënisht vet e kam zgjedhë, 10 vjeçar kam qenë, tre ditë kam mendu cilin profesion me zgjedh. Tash pak në moshë jom, por e du profesionin dhe punoj “, tha ai.
Tutje Ciriku, tregoi edhe vështirësitë që ka pasur gjatë rrugës për krijimin e biznesit të tij të floktarit.
“Pa hangër pa pi si nxënës kam punu bënë vaki një bukë në ditë e kam hangër thatë për me kursy, për me ardhë deri tash ku jom këtu. Kur kam fillu me punu këtu në lokalin tim pa pasqyrë, pa karrike, por gradualisht nga një nga një i kam ble. Gjithmonë kam qenë optimist, kam pasë besim në veti shumë dhe atë çka e kam mendu e kam realizu”, shtoi ai./teve1.info./