Kandidatja për deputete nga radhët e Partisë Demokratike të Kosovës, Ganimete Musliu, ka thënë se kjo parti do të jetë fituese e zgjedhjeve parlamentare të 28 dhjetorit dhe se Bedri Hamza do të jetë kryeministër.
Ajo ka thënë se janë të bashkuar më shumë se kurrë që Hamza të jetë kryeministër.
“Kemi hyrë në garë për të fituar dhe jam e bindur se do t’i fitojmë zgjedhjet. Bedri Hamza do të jetë kryeministër. Asnjëherë s’kemi qenë më të vendosur për t’i ndihmuar Bedri Hamzës për t’u bërë kryeministër”, ka thënë Musliu në emisionin “InfoNata” në Tëvë1.
Ajo ka thënë se programi i kandidatit të kësaj partie për kryeministër, Bedri Hamza do të sjellë mirëqenie e siguri.
“Pjesë e programit të Bedri Hamzës janë, mirëqenia, ku Hamza ka premtuar rritje pagash për gjithë punëtorët e sektorit publik, 50% ngritje të gjitha pensioneve dhe asistencës sociale. Pikë tjetër është heqja e tatimit nga disa produkte. Siguria e vendit”, ka thënë ajo.
E duke komentuar deklaratën e kryeministrit në detyrë dhe kandidatit për kryeministër, Albin Kurti , se partitë opozitare po japin premtime, pasi siç ka thënë ai e dinë se nuk do të vijnë në pushtet, Musliu ka thënë se këto janë përralla të Kurtit.
“Prrallagji, një njeri që mendon ta marrë mandatin e radhës me përrall. Qytetarët nuk i besojnë, ata i besojnë gjendjes reale me të cilën ballafaqohen”, ka thënë ajo.
Musliu ka thënë se PDK është e gatshme të qeverisë me partnerë, duke thënë se vetëm LVV nuk dëshiron bashkëqeverisje.
