Deputeti i Lëvizjes Vetëvendosje, Arbër Rexhaj, ka reaguar pas vendimit të Gjykatës Kushtetuese për masën e përkohshme lidhur me konstituimin e Kuvendit të Kosovës, duke theksuar se subjekti i tij nuk do të japë votë për Listën Serbe, edhe nëse thotë kjo Gjykatë.
Ai thotë se e respektojnë çdo vendim të Kushtetueses, derisa ajo nuk e cenon demokracinë dhe Republikën.
“Nëse Gjykata Kushtetuese thotë me votu Listën Serbe, a ta merr mendja që e respektojmë? A çoj dorë unë për Listën Serbe. Unë respektoj çdo vendim të Gjykatës Kushtetuese derisa ajo nuk e cenon Republikën, derisa ajo nuk e cenon demokracinë, pra çdo vendim që ka të bëjë me këto ne e respektojmë, por nëse më thotë mua Gjykata Kushtetuese voto Listën Serbe, unë nuk e votoj, jo vetëm unë, por as VV-ja”, tha ai në emisionin “Info Nata” në Tëvë1.
Ai kujtoi se Vetëvendosje ka votuar për kandidatin Nenad Rashiq si nënkryetar të Kuvendit, për të shmangur që çështja të përfundonte në Kushtetuese, por opozita nuk e ka mbështetur atë.
“Ne e patëm rastin ta votojmë një nënkryetar nga Lista Serbe, e bëmë atë, e votuam Rashiqin që ai të kalonte dhe të bëhen nënkryetar. Subjektet tjera opozitare e kanë ditur se si do të jetë përfundimi, sepse ne jemi në politikë dhe gjërat i shohim më larg. Ne e kemi ditur se nëse nuk votohet Rashiq, deputetët e Listës Serbe do ta dërgojnë lëndën në Gjykatën Kushtetuese dhe këtu pra është edhe përmbajtja kryesore, se po të votohet ai lënda edhe po të shkonte ne do ta kishim nënkryetarin legjitim me 61 vota ose edhe më shumë. Mirëpo, ata nuk kanë dashur ta votojnë sepse ata kanë dashur të shkojë lënda në Gjykatën Kushtetuese, sepse këta e duan Listën Serbe që të ketë pozita edhe në Kuvendin e Kosovës. Sepse, me ta gjithmonë kanë bashkëqeverisur”, deklaroi ai.
Sipas Rexhajt, Vetëvendosje do të mbetet e palëkundur në qëndrimin e saj për të mos i dhënë legjitimitet Listës Serbe në institucionet e Republikës./teve1.info/
