Reshjet intensive të shiut që kanë përfshirë vendin këtë të diel (26 tetor), kanë shkaktuar problematika të shumta në qarkun e Shkodrës, ku situata më e rënduar paraqitet në bashkinë Vau i Dejës.
Sipas njoftimit zyrtar të Prefektit të Qarkut Shkodër, disa banesa janë përmbytur në njësitë administrative Bushat, Vau Dejës dhe Hajmel. Ndërkohë, lumi Glinë paraqet rrezik për dalje nga shtrati, duke kërcënuar përmbytjen e rreth një të tretës së territorit të qytetit.
Në bashkinë Fushë Arrëz janë raportuar rrëshqitje gurësh dhe inertesh në rrugët rurale, si dhe prezencë uji në disa akse rrugore, duke vështirësuar qarkullimin.
Në bashkinë Shkodër, konkretisht në njësinë administrative Gur i Zi, po merren masa për pastrimin e urës dhe përroit që ka shkaktuar vështirësi në qarkullim dhe rrezik për banorët.
Autoritetet lokale dhe strukturat përgjegjëse janë në terren dhe po monitorojnë nga afër situatën, me qëllim marrjen e masave të nevojshme për menaxhimin e pasojave të motit të keq.
