Në këtë formë po mundohen ta largojnë ujin.
Është kjo gjendja në të cilën përfundoi ky parking nëntokësor në qendër të Rahovecit.
Deri në këtë situatë erdhi pas reshjeve të mëdha të shiut që nisën që nga mbrëmja e së dielës, e vazhduan edhe mëngjesin e së hënës.
Kjo bëri që dëmet e shkaktuara të jenë të mëdha.
“Për shkak të sasisë së madhe të ujit që ka ardhur dhe bllokimit të rrjetës së kanalizimit nga zhavorri dhe mbeturinat e tjera që i ka sjellë uji, është përmbytur edhe parkingu nëntokësor. Bllokimi i rrjetës ka bërë që uji të depërtojë në parking. Tashmë jemi duke punuar me ekipet, kemi vendosur edhe pompat dhe besoj se brenda një ore gjendja do të jetë në rregull”, ka thënë Mullabazi.
E jo larg nga këtu, dëmtime pësuan edhe këta banorë.
Familja Vuçiterna nuk pranoi të flas para kamerës, por prapa saj thanë se kjo nuk është hera e parë që u përballën me të tillë gjendje.
Sipas tyre, problemi qëndron te shtrati i lumit “Dullo”.
Por humbjet ishin të mëdha gjatë së hënës edhe për punuesit e tokave.
E reshjet e disa ditëve më parë, bujku Vllaznim Canzibaj, thotë se ia ndaluan tërësisht prodhimin.
Për këtë, ai po kërkon ndihmë nga institucionet.
“Shpresoj dhe mendoj që Qeveria e Kosovës do të marrë masa dhe do t’i ndihmojë bujqit, sepse është momenti i fundit. Rahovecin dhe Istogun i ka përfshirë moti i lig. Për Rahovecin, kjo është hera e katërt që nga viti 2018 që pësohen dëme, ndërsa askush nuk po ndërmerr masa”, u shpreh një bujk.
Nga Komuna thonë se të gjitha dëmet e deritanishme, do mundohen t’i kompensojnë.
“Komisioni, pas pranimit të kërkesave, do të dalë në terren për t’i regjistruar dëmet e shkaktuara dhe për t’i përcjellë ato në nivel qendror. Shpresoj dhe besoj se duhet të kompensohen jo vetëm dëmet e rastit të sotëm, por edhe ato të 21 korrikut, si dhe dëmet e mëhershme”, ka theksuar Berisha.
Nga reshjet e shiut ditë më parë, dëmtime pati në shumë komuna.
