Kryeministri në detyrë i Kosovës, Albin Kurti, të dielën në New York është takuar me kongresistin amerikan nga radhët e Partisë Republikane, Mike Lawler, njëherësh anëtar i Komitetit për Punë të Jashtme në Dhomën e Përfaqësuesve të Shteteve të Bashkuara të Amerikës.
Sipas Zyrës së Kryeministrit, Lawler e ka informuar Kurtin për vendimin e tij për t’iu bashkuar Kaukusit të Çështjeve Shqiptare në Kongresin Amerikan.
Gjatë këtij takimi u diskutua për thellimin e partneritetit ndërmjet Kosovës dhe Shteteve të Bashkuara të Amerikës, me fokus te bashkëpunimi ekonomik, investimet e huaja direkte dhe shkëmbimet tregtare.
“Kurti e njoftoi kongresistin për zhvillimet e fundit në vend dhe për progresin e arritur vitet e fundit në ekonomi, demokraci, siguri dhe sundimin e ligjit,” thuhet në njoftim.
Temë e diskutimit ishte gjithashtu edhe rreziku i ndikimit rus në Evropë dhe në Ballkanin Perëndimor./teve1.info/
