Tash e dy ditë kanë filluar renovimet në klinikën e Onkologjisë në QKUK. Tashmë kati i dytë është jashtë funksionit, gjë e cila ka bërë që pacientët të zhvendosen në përdhesën e klinikës së Ortopedisë së vjetër deri në përfundimin e punimeve të cilat pritet të zgjasin rreth 180 ditë pune. Fillimin e punimeve në Onkologji e ka quajtur si të domosdoshëmn drejtori i klinikës, Ilir Kurtishi.
E i gjithë kati i dytë është jashtë funksionit, teksa për këtë kanë vendosur edhe shirita.
Pasi që në klinikën e Onkologjisë në Qendrën Klinike Universitare të Kosovës janë bërë rreth dy ditë që kanë filluar renovimet, gjë e cila sipas drejtorit të kësaj klinike Ilir Kurtishi, ishte e nevojshme për shumë arsye.
“Realisht rinovimi ka qenë i domosdoshëm për arsye të rritjes së kapaciteteve të klinikës dhe nga 45 shtretër klinika do të ketë dyfish më shumë kemi planifiku të kemi rreth 90 shtretër, e cila do ta zbus pritjen e pacientëve, ambient më të përshtatshëm për pacientët si dhe dhënia e terapisë do të jetë më e lehtë…”, tha drejtori i Klinikës së Onkologjisë, Ilir Kurtishi.
Mirëpo deri në përfundimin e punimeve të cilat pritet të zgjasin rreth 180 ditë punë, pacientët të cilët janë të hospitalizuar janë zhvendosur në përdhesën e klinikës së Ortopedisë së vjetër aty ku edhe do vazhdojnë të marrin trajtimin e nevojshëm.
“Pjesën e pacientëve që i kemi pas të hospitalizuar i kemi transferu në hapësirat e një klinike tjetër ku ka qenë sterilizimi i vjeter, kemi 5-6 dhoma, është një komoditet më i mirë për pacientët tanë që i trajtojmë me efekte anësore që i trajtojmë 24, 48 orë ose tre ditorë, ndërsa pacientët tjerë ambulantorë vazhdojnë të marrin tretmanin në klinikën tonë”, u shpreh Kurtishi.
Drita Berisha, kryeinfermiere në këtë klinikë thotë që trajtimi për pacientët që janë zhvendosur do vazhdoj të jetë i njëjtë.
“Kushtet ku janë vendosur pacientët në klinikën e ish traumës është në përdhesën e ortopedisë së vjetër, trajtimi do të vazhdoj njëjtë, i kemi gjithsej 15 shtretër për hospitalizim dhe 4 shtretër për transfuzion…”, tha kryeinfermierja e Klinikës së Onkologjisë, Drita Berisha.
Këtë klinikë së fundi e vizitoj edhe ministri i shëndetësisë, Arben Vitia, i cili tha që po vazhdojnë me investime të reja në onkologji dhe se do të dyfishohen kapacitetet për pacientët.
