Familja Bunjaku në Samadrexhë të Vushtrrisë, të enjten i hapi dyert për mysafirë.
Në hyrje të shtëpisë, u vendos edhe fotografia e heroit të Kosovës.
Është ky, ish-rreshteri, Afrim Bunjaku, i cili tri vjet më parë, u vra gjatë një sulmi terrorist serb.
E gjithë ngjarja ndodhi në orë e para të 24 shtatorit të vitit 2023 në Banjskë të Zveçanit.
Të enjten, mysafirët për t’i pritur doli edhe djali i Afrim Bunjakut.
E mbishkrimi në bluzën e tij, e tërhoqi vëmendjen e ushtrueses së detyrës së presidentes së Kosovës, Albulena Haxhiut, e cila erdhi për vizitë në këtë familje.
“Sa bukur po të rrin maica”, u shpreh Haxhiu.
Familjen në tre vjetorin e rënies së Bunjakut, e vizituan edhe ish-kolegët e tij.
Pas kësaj, u bën edhe homazhe tek varri i heroit të fundit të Kosovës.
Ndërkaq, në vendin ku Afrim Bunjaku u vra tri vjet më parë, u vendos gurthemeli i obeliskut në nderim të tij.
Nga Banjska e Zveçanit, u kërkua që përgjegjësit të vihen para drejtësisë.
“Ne kemi bërë thirrje në vazhdimësi që Serbia ta dorëzojë kryeterroristin Milan Radojçiq e po ashtu edhe mbi 40 terroristë të tjerë që ishin pikërisht në këtë pjesë të territorit të Republikës së Kosovës me qëllimin që të shtynin përpara planin e Serbisë. Edhe sot bëjmë thirrje partnerëve tanë ndërkombëtarë që t’i bëjnë presion Serbisë sepse nuk mund të vazhdohet tutje në asnjë proces tjetër pa u dorëzuar Serbia terroristët, pa e dorëzuar Serbia kryeterroristin Milan Radojçiq”, u shpreh Haxhiu.
E sakrifica e Bunjakut, u vlerësua lart edhe nga ministri i Punëve të Brendshme, Xhelal Sveçla.
“Nata në mes datës 23 dhe 24 shtator të vitit 2023 ishte ndër betejat më të rëndësishme, ku shteti i Kosovës u ballafaqua me një sulm terrorist dhe doli fitimtar. Kjo falë sakrificës së rreshterit Afrim Bunjaku dhe angazhimit të qindra policëve të tjerë”, tha Sveçla.
E i pari i policisë në vend, tha se 24 shtatori i vitit 2023, i dha fund mbizotërimit të bandave terroriste në veri.
“Ju e dini se Policia e Kosovës punon në kushte të rrezikshme dhe ajo ditë ka qenë e rrezikshme për ne. Fatkeqësisht ranë Afrimi dhe kolegët e tij, se kanë qenë në detyrë, mirëpo ju garantoj se gjaku i Afrimit nuk ka shkuar, sepse shokët e Afrimit e kanë nxjerrë hakun e tij shumëfish. Grupet terroriste e kanë dëgjuar zërin e pushkës dhe fuqisë tonë dhe, nëse rrezikohemi prapë, do të dalim përballë çdo sfide dhe duke qenë në përpjekjen më serioze që kanë bërë grupet terroriste”, tha Gazmend Hoxha.
Ndryshe, 45 persona janë akuzuar nga Prokuroria Speciale e Kosovës për sulmin në Banjskë, përfshirë kryeterroristin, Milan Radoiçiq.
Ndërsa deri më tani, Gjykata Themelore në Prishtinë i ka dënuar me burgim të përjetshëm Blagoje Spasojeviq dhe Vladimir Toliqin, si dhe Dushan Maksimoviq me 30 vjet burgim.
