Një burrë 64-vjeçar mbeti i zhdukur të enjten pas një rrëshqitjeje të madhe shkëmbinjsh dhe akulli nga akullnaja Birch në një shpat mali zviceran, që ndodhi të mërkurën.
Rrëshqitja mbuloi me baltë pothuajse të gjithë fshatin alpin Blatten, i cili ishte evakuuar më parë nga autoritetet. Këshilltari i Shtetit Stéphane Ganzer tha se 90% e fshatit ishte shkatërruar.
Policia e Valais po kryen një operacion kërkim-shpëtimi, duke përdorur edhe një dron me kamerë termike. Rrëshqitja varrosi edhe shtratin e lumit Lonza, duke rritur rrezikun e bllokimit të rrjedhave të ujit.
Rreth 300 banorë dhe bagëti ishin evakuuar ditët e fundit për shkak të rrezikut nga shembja e akullnajës, që përbënte rreth 1.5 milion metra kub akulli, raporton AP.
Glaciologët zviceranë kanë paralajmëruar përshpejtimin e shkrirjes së akullnajave, kryesisht për shkak të ngrohjes globale. Në vitin 2023, Zvicra humbi 4% të vëllimit të akullnajave të saj, rënia e dytë më e madhe në histori pas vitit 2022.
