Rektori i Universitetit të Prishtinës, Arben Hajrullahu, do të mbajë sot konferencë për media, në orën 14:00.
Sipas njoftimit Hajrullahu do të njoftojë mediat në lidhje “me pengesat që po vonojnë largimin e shtyllave të tensionit të lartë nga afërsia e objektit të Fakultetit të Bujqësisë dhe Veterinarisë dhe rrjedhimisht po e shtyjnë rregullimin e ndërtesës dhe nisjen aty të mësimit dhe punës kërkimore.”
“Pavarësisht marrëveshjes së Universitetit të Prishtinës me Operatorin e Sistemit, Transmisionit dhe Tregut (KOSTT) për largimin e shtyllave dhe telave të tensionit të lartë nga afërsia e objektit të FBV-së, një depo e pazhvendosur e KEDS-it po e pengon këtë proces. Si rezultat i moslargimit të shtyllave dhe telave të tensionit të lartë, studentët dhe personeli akademik e administrativ i Fakultetit të Bujqësisë dhe Veterinarisë po i zhvillojnë aktivitetet e tyre akademike në kushte shumë të vështira dhe nuk po mund ta shfrytëzojnë që më shumë se një dekadë objektin e ndërtuar për ta”, thuhet në njoftim.
