Në një takim me dyer të mbyllura, morën një vendim të rëndësishëm.
Këshilli Prokurorial, të enjten, anuloi procesin e rekrutimit të prokurorëve të rinj.
Për këtë vendim, nuk u dha asnjë shpjegim.
Anulimi i procesit të rekrutimit të prokurorëve të rinj, konsiderohet se është pasojë e situatës aktuale në Këshill, e krijuar pas mospajtimeve mes anëtarëve.
“Është ekskluzivisht si rezultat i këtyre veprimeve dhe ngjarjeve që natyrisht mund të kenë rezultuar me pamundësi të zhvillimit të procesit të rekrutimit brenda afateve siç përcaktohen me dispozita respektive të rregullores për rekrutimin e prokurorëve. Prandaj, në bindjen time është në vazhdën e dështimeve që ky Këshill ka pasë në jo pak raste”, deklaroi avokati Ardian Bajraktari.
Këshilli Prokurorial, në vazhdimësi ka ngritur si nevojë shtimin e prokurorëve dhe stafit profesional.
Në këtë rrafsh, shtyerja e proceseve rekrutuese, vlerësohet me efekt negativ në punën e sistemit prokurorial.
Në ndërkohë Këshilli Prokurorial ka bërë të ditur se brenda afatit të paraparë ligjor, do të publikohet vendimi për anulimin e procesit të rekrutimit të prokurorëve të rinj, në të cilin do të bëhen të ditura edhe arsyet e këtij vendimi.
