Deputetja Musliu-Shoshi, e cila është anëtare e Komisionit për Punë të Jashtme në Kuvendin e Kosovës, ka thënë se rekomandimi i Rekës është në kundërshtim me ligjin.
Sipas saj, Gërvalla i largoi konsujt që i kishte targetuar si politik për të emëruar një ish-ministër.
“Qeveria Kurti i largoi dhjetëra diplomatë e konsuj vetëm pse i kishte targetuar si të afërt me njerëz të ish-qeverive të kaluara, ndërsa tash vetë ministrja Gërvalla rekomandon një ish-ministër të LVV-së për Konsull të Përgjithshëm në New York. Kaq për moralin politik të Gërvallës, me të cilin po e udhëheq politikën e jashtme. Krejt në kundërshtim me ligjin dhe aktet nënligjore në fuqi!”, ka shkruar Musliu-Shoshi.
Ajo ka vlerësuar se pasojat e keqqeverisjes me MPJD-në dhe të largimit të diplomatëve e konsujve, që me vite të tëra i kanë shërbyer vendit, Kosova do t’i vuajë shumë gjatë.
Ky reagim i deputetes Musliu-Shoshi vjen pas raportimit të Demokracia.com se Gërvalla e ka rekomanduar për konsull në Nju Jork, ish-ministrin Blerim Reka./eo
