Të enjten nëntë deputetë e kësaj partie dhe një deputet i partisë GI SPO u betuan.
Kryetari Kuvendit, Glauk Konjufca, pas leximit të emrave të deputetëve të rinj të Listës Serbe, iu kërkoi të ngrihen në këmbë.
E menjëherë pas betimit, të njëjtit lëshuan sallën.
Pak minuta më vonë për këtë rikthim, reagoi edhe vetë Lista Serbe.
“Sot në Kuvendin e Prishtinës nëntë deputetë të Listës Serbe kanë verifikuar teknikisht mandatet, duke i mbajtur në duar të sigurta dhe janë larguar menjëherë nga seanca e Kuvendit. Vendimi i sotëm strategjik ka penguar më drejtpërdrejt realizimin e planit të Albin Kurtit dhe serbëve të përshtatshëm për të për të ndryshuar kushtetutën dhe ligjet që garantojnë të drejtat e popullit serb në Kosovë. Synimi i Kurtit dhe Rada Trajkoviqit, por edhe të tjerëve si ajo, ishte të votonin ndryshimet kushtetuese që do të çonin në shfuqizimin e komunave serbe, heqjen e pronave nga Kisha Ortodokse Serbe, heqjen e gjuhës serbe, e drejta e përfaqësimit në institucione”, thuhet në reagimin e kësaj partie.
E politikania serbe, Rada Trajkoviç së cilës ju lakua emri nga Lista Serbe i reagoi këtij subjekti.
“Sapo jam informuar se Lista Serbe ka marrë 9 mandate të reja në Kuvendin e Kosovës për të penguar hyrjen time në të dhe për të mos lejuar që komuniteti serb në Kosovë të marrë përfundimisht përfaqësues të vërtetë politikë”, thuhet në reagimin e saj.
Në anën tjetër, si dështim të këtij subjekti politik dhe presidentit serb, Aleksandër Vuciq, e sheh njohësi i kushtetutës, Mazllum Baraliu.
Sipas Baraliut, Serbia ka mbetur pa strategji në këtë rast.
Kandidatët e Listës Serbe tashmë deputetët Millan Kostiq, Zoran Maksimoviq, Olivera Zdravkoviq, Millan Joksimoviq, Ksenia Bozoviq, Rados Mihajlloviq, Nenad Radenkoviq, Svetisllav Jokiq, Biljana Maksiq dhe kandidati nga partia tjetër serbe GI SPO, Cvetko Velkoviq kanë zëvendësuar deputetët e dorëhequr.
Kronika e gazetares Fetije Kamberi.
