Gjykata Supreme e ka refuzuar kërkesën e mbrojtjes së të akuzuarit për keqpërdorim të pozitës zyrtare, Nagip Krasniqi, për heqjen e masës së paraburgimit, raporton teve1.info
Sipas komunikatës së Supremes, Kolegji i kësaj gjykate e ka refuzuar si të pabazuar kërkesën për mbrojte të ligjshmërisë ndaj të pandehurit N.K., të paraqitur kundër aktvendimit të Gjykatës Themelore në Prishtinë dhe aktvendimit të Gjykatës së Apelit të Kosovës.
“Në çështjen penale ndaj të pandehurit N.K., për shkak të veprave penale: keqpërdorimi i pozitës apo autoritetit zyrtar, ushtrimi i ndikimit, keqpërdorimi i pozitës apo autoritetit zyrtar, konflikti i interesit, duke vendosur përkitazi me kërkesën për mbrojtje të ligjshmërisë të mbrojtësve të pandehurit, avokatët Virtyt Ibrahimaga dhe Taulant Ferizi, në seancën e mbajtur më datë 16.05.2023, kolegji i Gjykatës Supreme vendosi për refuzimin e kësaj kërkese”, thuhet në komunikatë.
Ish Kryeshefi i Korporatës Energjetike të Kosovës, Nagip Krasniqi, ishte arrestuar javë më parë me dyshim për keqpërdorim të pozitës apo autoritetit zyrtar.
Sipas Prokurorisë Speciale, Krasniqi është arrestuar për shkak të dyshimit se ka kryer veprat: “Keqpërdorimi i pozitës apo autoritetit zyrtar” , “Ushtrimi i ndikimit” dhe “Konflikti i interesit”.
Krasniqit i ishte bastisur zyra në Prishtinë dhe dy banesa në lokacione të ndara në Prishtinë.
Me vendim të Gjykatës Themelore në Prishtinë, Krasniqit i ishte caktuar masa e paraburgimit prej 30 ditësh.