Nënkryetarja e PDK-së, Vlora Citaku ka reaguar pasi që MINT ka marrë vendim për mbylljen e televizionit, Klan Kosova.
Ajo tha se idea e lirisë së fjalës dhe mendimit po sulmohet brutalisht dhe kjo më nuk është dhe nuk duhet të jetë betejë e vetëm një mediumi -kjo është betejë e shoqërisë.
“Qeveria e Albin Kurtit paska marrë vendim që ta mbyllë Klan Kosovën. Duke ia marrë çertifikatën e biznesit pamundësohet operimi i njërit prej mediumeve më të mëdha e më të rëndësishme në vendin tonë. Sot, idea e lirisë së fjalës dhe mendimit po sulmohet brutalisht.
Kjo më nuk është dhe nuk duhet të jetë betejë e vetëm një mediumi. Kjo është betejë e shoqërisë. E kjo shoqëri as nuk nënshtrohet e as nuk frikësohet. Të frikësuar e në panikë janë vetëm ata në qeveri”, ka shkruar ajo.
Kujtojmë se sot, Komisioni i Ankesave në ARBK e ka refuzuar ankesën e Klan Kosovës për pezullimin e certifikatës së biznesit.
