Është një nga Qendrat e Mjekësisë Familjare në Ferizaj.
Por nga ora 16:00 kjo dhe disa QMF tjera në këtë Komunë nuk do të ofrojnë më shërbime.
Kjo ka ngritur shqetësimin e qytetarëve por edhe opozitës në këtë Komunë.
Asamblisti nga Lëvizja Vetëvendosje, thotë se kjo ka krijuar vështirësi dhe se qytetarët duhet drejtuar të gjithë te shërbimi emergjent në qytet.
“Ai arsyetohet se nuk po ka mjekë të mjaftueshëm pra staf të mjaftueshëm dhe për këtë arsye QMF-të mbyllen pas orës 16:00 pra qytetarët zgjedhin pra nuk duhet të sëmuren pas orës 16:00 sepse në këto QMF nuk mund të marrin shërbime shëndetësore… Tashmë jemi në sezonën e verës fluksi i qytetarëve rritet sidmos mërgimtarët që vijnë ata do duhej të kishin shërbime sa më të mira t’u ofrohej shërbime sa më të shëndetësore në mënyrë që mos të kemi tollovi pastaj në shërbimin emergjent primar”, ka thwnw Rexhepi.
Mirëpo nga niveli lokal thonë se kjo është bërë për shkak të nismës në nivel vendi për një orar unik të këtij niveli shëndetësor.
“Orar që ka me qenë 08:00 -16:00, që korrespondon me atë që tashmë veçse ka filluar përzgjedhja e mjekut famijar parashihet se gjatë këtij viti të përfundojë diku 50 për qind ndërsa gjatë vitit 2026 të përfundojë komplet ky projekt. Vet përzgjedhja e mjekut familjar ta imponon një orar 08:00 – 16:00, në të njëjtën kohë ne kemi filluar me këtë orar duke u bazuar në atë udhëzim administrativ dhe bisedën që kemi pasur me Ministrinë e Shëndetësisë”, tha Kemajl Emini –drejtor i Shëndetësisë në këtë komunë
Sipas drejtorit komunal, kjo u është imponuar edhe për shkak të mungesës së stafit shëndetësor.
“Përkundër kërkesave të vazhdueshme që kemi pasur në Ministrisë përkatëse për shtim stafi duke marrë parasysh që ne jemi komuna e dytë në nivel vendi sa i përket numrit të banorëve dhe kemi shtim të vazhdueshëm të banorëve mekanikë… Ne kemi disa njësi të caktuara, kemi bërë shtimin e rritjes në kuptimin e rritjes së sektorëve të caktuar siç është emergjenca 100 për qind”, u shpreh Emini.
Qytetarët e këtyre zonave tashmë kontrollet po i bëjnë në shërbimin emergjent të këtij qyteti.
