Qendra e Resurseve e Handikos në Prishtinë ishte e zbrazët.
Përveç personave me aftësi të kufizuara dhe familjarëve të tyre, në të nuk u panë madje as punonjësit e kësaj qendre.
Kjo pasi kjo qendër e Shoqatës së Paraplegjikëve dhe Paralizës së fëmijëve në Kosovë, që nga e marta nuk ofron më shërbime.
Mijëra familje kanë marrë shërbime falas nga kjo Shoqatë.
Ndër to edhe e ëma e Uranit, Mimoza Bytyqi-Rrahmani.
Për të birin e saj me aftësi të kufizuara, Mimoza thotë se mungesa e shërbimeve e dëmton shumë.
“Mungesa e këtyre shërbimeve na dëmton, psh kur ne kemi shku dhe kemi marrë shërbime, kemi kalu kohë, jemi taku edhe me fëmijë tjerë, persona tjerë me aftësi të kufizuar, kemi shkëmby përvoja, kemi qarë hallet..,e kjo mungesë na dëmton, po edhe në anën ekonomike i dëmton familjet sepse ato shërbime ne i kemi marrë falas, pa kosto, e tash fëmijët e kanë nevojë sepse aftësia e kufizuar nuk është një çështje sot e nesër por në vazhdimësi janë sfida jetëgjata të cilat kërkojnë përkushtim…”, shprehet ajo.
Prandaj në mungesë të fondeve, përmirësimin e tyre, drejtori i Handikos-it, Afrim Maliqi e sheh të vështirë në vazhdim.
“Sigurisht që fëmijët kanë me pësu regres, sikurse tani që nuk ofrojmë shërbime dhe nuk do të mundemi në këtë formë me i majtë shërbimet”, thotë Maliqi.
Ndërsa mbështetjen institucionale, Maliqi e konsideron të dobët.
“Ne veç kemi përfundu të gjitha projektet që kanë të bëjnë me ofrimin e shërbimeve, në fakt Ministria e Drejtësisë e ka zgjatë një afat kohor janar-prill por ato nuk janë mbështetje, ato janë projekte. Dhe kjo mbështetje asesi nuk është e mjaftueshme”, shprehet ai.
Mbi 18 mijë persona marrin shërbime në të gjitha qendrat e Handikos në Kosovë.