Rebelët e mbështetur nga Ruanda dhe Kongoja nënshkruan të shtunën në Katar një deklaratë parimesh, që synon t’i japë fund luftimeve shumëvjeçare dhe të hapë rrugën për një marrëveshje gjithëpërfshirëse paqeje.
Kjo marrëveshje do të përfshijë edhe rivendosjen e autoritetit shtetëror në qytetet kryesore të lindjes së Kongos, të cilat aktualisht janë nën kontrollin e kryengritësve.
Sipas ministrit të shtetit të Katarit, Mohammed bin Abdulaziz bin Saleh Al-Khulaifi, marrëveshja përfshin masa për “ndërtimin e besimit”, si lirimi i të burgosurve dhe të paraburgosurve dhe rikthimi i institucioneve shtetërore në të gjitha zonat e vendit, përfshirë ato të kontrolluara nga M23.
Megjithatë, mbetet e paqartë nëse marrëveshja parashikon një tërheqje të drejtpërdrejtë të M23 nga qytetet që ata kontrollojnë, pasi palët kanë interpretime të ndryshme.
Bertrand Bisimwa, një prej drejtuesve të M23, deklaroi në rrjetin X se marrëveshja nuk ka të bëjë me tërheqjen, por me vendosjen e mekanizmave që fuqizojnë shtetin për të marrë përgjegjësitë e tij.
Po ashtu, zëdhënësi i M23, Lawrence Kanyuka, i tha agjencisë AP se grupi ndodhet në Goma “bashkë me popullsinë” dhe nuk ka ndërmend të largohet.
Në kundërshtim me këtë, zëdhënësi i qeverisë së Kongos, Patrick Muyaya, theksoi se dokumenti përfshin një “tërheqje të panegociueshme” të rebelëve, e pasuar nga vendosja e forcave dhe autoriteteve shtetërore.
M23, grupi më i fuqishëm ndër më shumë se 100 fraksione të armatosura që operojnë në lindje të Kongos, mbështetet nga Ruanda dhe është përfshirë në një konflikt që ka shkaktuar zhvendosjen e afro 7 milionë njerëzve. OKB e ka cilësuar këtë si një nga krizat më të gjata dhe më të rënda humanitare në botë.
Deklarata e së shtunës përbën angazhimin e parë të drejtpërdrejtë mes palëve që prej ofensivës së M23 në fillim të këtij viti, kur morën kontrollin e dy qyteteve strategjike në lindje të Kongos.
Marrëveshja përfundimtare e paqes pritet të nënshkruhet jo më vonë se 18 gushti dhe do të bazohet në marrëveshjen e ndërmjetësuar nga SHBA mes Kongos dhe Ruandës, të arritur në qershor.
