Sipas VV-së, dënimi i Mustafës me 26 vite, është i papranueshëm, teksa kanë theksuar se partia e tyre ishte e vetmja që nuk e ka votuar themelimin e Gjykatës Speciale në atë kohë.
“Liria dhe pushtimi nuk barazohen kurrë!. Salih Mustafa ka qenë luftëtar i lirisë. Ai bashkë me shokë e shoqe në UÇK u angazhuan për të mbrojtur kombin shqiptar të cilin Serbia dëshironte ta zhdukte prej Kosovës, gjatë viteve të pushtimit. Dënimi i Salih Mustafës nga Gjykata Speciale me 26 vite burg është i papranueshëm për ne. Shpresojmë që në shkallën e Apelit ish-luftëtari Salih Mustafa të pastrohet nga akuzat, të cilat nuk po duket se kanë dëshmi e prova për përgjegjësitë e tij direkte. Lëvizja VETËVENDOSJE! dhe subjektet opozitare asokohe ishin të vetme subjekte politike që nuk e kanë votuar themelimin e Gjykatës Speciale”, thuhet në reagimin e tyre.
Madje kanë shkruar Kosova ka nevojë vetëm për institucione normale, pasi siç thanë ata, drejtësia e vendit duhet të funksionojë me gjykata normale e jo gjyqe speciale.
“Ne besojmë se Kosova nuk ka nevojë për zgjidhje speciale e eksperimente, por për institucione normale si të çdo vendi tjetër. Edhe drejtësia jonë duhet të rrjedhë nga funksionalizimi i gjykatave normale e jo duke themeluar gjyqe speciale. Mbi 12 mijë shqiptarë janë vrarë nga serbët e armatosur si ushtri, polici e paramilitarë. Mbi 20 mijë janë viktima të dhunës seksuale të përdorur si mjet lufte nga serbët. Ende të pagjetur janë 1653 persona, ndërsa në gjithë vitet e pasluftës janë zbuluar varreza masive me trupa shqiptarësh në Serbi. Mbi 200 mijë shtëpi, banesa, lokale, fabrika të shqiptarëve janë djegur e shkatërruar nga serbët deri para çlirimit në 12 qershor 1999”, kanë shkruar tutje.
Më tej, ata kanë shkruar se Serbia tani është e angazhuar vetëm në destabilizimin e Kosovës, teksa kanë përmendur edhe barrikadat e vendosura në veri të Mitrovicës.
“Vetë termi “spastrim etnik” u krijua në Serbi, si një lloj formule për të mos thënë gjenocid. E megjithatë vetëm 26 serbë janë dënuar për krime lufte. Millosheviqit nuk iu shqiptua dënim nga drejtësia ndërkombëtare. Në gjyqin e Stanishiqit, shefit të shërbimit sekret serb që themeloi paramilitarët dhe u përfshi direkt në gjenocid, pati ndikim politik që të mos dënohej rëndë. Sot Serbia është e angazhuar në destabilizimin e Kosovës, duke sponsorizuar kriminelë që ngrenë barrikada e që lënë të vdesin nga mungesa e mjekimit vetë qytetarët serbë të Kosovës. Ajo vazhdon të kërcënojë çdo ditë me luftë duke përmendur kthimin e trupave ushtarake në Kosovë ndërkohë që provon ta destabilizojë edhe Bosnjen e Malin e Zi”, kanë shkruar tutje.
Kujtojmë se gjykatësja Mapi Feld-Folia, ka thënë se dënimi i Mustafës është individual dhe nuk ka të bëjë me luftën e UÇK-së ose popullin e Kosovës./teve1.info/.
