Oda e Hotelerisë dhe Turizmit e Kosovës (OHTK), ka reaguar rreth ndalimit të qindra qytetarëve të Kosovës në Serbi, gjatë kalimit të tyre në këtë vend nga shtetet perëndimore, raporton teve1.info
Përmes një komunikate për medie, OHTK ka shkruar se e ka marrë me shqetësim të madh lajmin për ndalimin e qytetarëve të Kosovës që po vinin në drejtim të Kosovës në kufirin me Hungarinë, në pikat kufitare në Shid dhe Suboticë, te vendkalimi kufitar Dheu i Bardhë të cilët nuk po lejohen as të lëvizin përpara dhe as të kthehen pas.
“Ky lajm ka tmerruar OHTK-në dhe udhëheqësit e saj prandaj kërkojmë nga Qeveria e Kosovës dhe institucionet tjera përkatëse që të veprojnë sa më parë në mënyrë që qytetarët tanë të lirohen të lëvizin lirshëm. E drejta për lëvizje të lirë bazuar në të gjitha aktet ndërkombëtare u takon të gjithë njerëzve dhe askush nuk ka të drejtë t’ua mohoj këtë qytetarëve të Kosovës. Është koha që institucionet tona dhe ato të shtetit shqiptar të reagojnë ndaj këtij akti qyqar të Serbisë. Apelojmë tek Qeveria që qytetarëve tanë t’iu ofrohet mbrojtje dhe mbështetje duke uruar që ata sa më parë të kthehen në Kosovë”, thuhet në njoftim.