Kryetari i PDK-së, Memli Krasniqi ka thënë se është vërtetë i turpshëm dështimi i miratimit të Rezolutës së propozuar nga partia që udhëheqë ai, përmes së cilës është kërkuar anulimi i vendimit për shtrenjtimin e energjisë elektrike dhe heqjen e bllok-tarifës.
Ai tha se abstenimi i deputetëve të Lëvizjes Vetëvendosje nga votimi i kësaj Rezolute është një tjetër dëshmi se varfërimi dhe përbuzja e qytetarëve të Kosovës, është qëllimi i vetëm i këtij pushteti.
“Natyrisht, atyre që e mbrojnë në çdo mënyrë e me çdo kusht Martin Berishajn e Nagip Krasniqin, nuk iu bëhet vonë për ankesat e shumë konsumatorëve që kanë pranuar e paguar fatura me çmime enorme përgjatë këtij dimri. Abstenimi i deputetëve të Lëvizjes Vetëvendosje nga votimi i kësaj Rezolute – është një tjetër dëshmi se varfërimi dhe përbuzja e qytetarëve të Kosovës, është qëllimi i vetëm i këtij pushteti”, ka shkruar Krasniqi.
Me 29 vota pro të opozitës, 55 abstenime të deputetëve të VV-së dhe asnjë kundër nuk është miratuar propozim-rezoluta në lidhje me çmimin dhe faturimin aktual të energjisë elektrike për konsumatorët.
Deputetët e partisë në pushtet kanë zgjedhur të abstenojnë për këtë rezolutë, e cila është propozuar në muajin e kaluar nga PDK-ja./teve1.info
