Korporata Energjetike e Kosovës përmes një njoftimi publik ka reaguar lidhur me situatën e furnizimit me energji elektrike.
Sipas KEK-ut, prodhimi ditor ka arritur në 20,640 megavatë në orë dhe Korporata aktualisht është duke operuar me pesë njësi gjeneruese.
“Korporata Energjetike e Kosovës (KEK Sh.A.) njofton opinionin publik se, me rënien e temperaturave që nga 19.12.2025, ka rritur në maksimum angazhimin operacional, duke operuar aktualisht me pesë (5) njësi gjeneruese. Si rezultat, prodhimi ditor po arrin në 20,640 MWh, duke forcuar stabilitetin e furnizimit me energji elektrike dhe qëndrueshmërinë e sistemit elektroenergjetik të Republikës së Kosovës në një periudhë me kërkesë të rritur.”, thuhet në reagim.
“Në kushte normale, KEK operon me katër njësi gjeneruese, ndërsa një njësi mbahet si rezervë e nxehtë për nevoja teknike dhe mirëmbajtje periodike. Megjithatë, pavarësisht moshës së avancuar të stabilimenteve, falë angazhimit të jashtëzakonshëm të stafit teknik dhe përkushtimit të menaxhmentit, është bërë e mundur operimi me pesë njësi gjeneruese, me përjashtim të dy ndërhyrjeve të shkurtra teknike në një njësi. KEK Sh.A. mbetet e përkushtuar të mbajë në operim sa më shumë kapacitete prodhuese të jetë e mundur, brenda kufijve të sigurisë teknike dhe stabilitetit operacional, për të garantuar prodhim të qëndrueshëm me energji elektrike.”, thuhet aty.
KEK gjithashtu ka apeluar për kursim të energjisë elektrike.
“Në këtë kontekst, siguria energjetike kërkon angazhim të përbashkët, ndaj ftojmë qytetarët që energjia elektrike të përdoret dhe të kursehet në mënyrë sa më racionale, veçanërisht në këtë periudhë me konsum të rritur.”
Ndërsa në vendin tonë sot po mbahen zgjedhjet e parakohshme parlamentare, Komisioni Qendror i Zgjedhjeve më parë ka raportuar për probleme me energji elektrike në gjashtë komuna të vendit, të cilat më pas tha se janë zgjidhur.
