Zgjedhjet që do të mbahen më 6 prill për kryetar të Federatës së Futbollit të Kosovës kanë bërë që të tensionohet situata.
Sot gjatë ditës ka patur lajme se kryetari aktual i këtij institucioni e ka sulmuar drejtorin për marrëdhënie me publikun, Artan Govori, me preteksin se ky i fundit e kishte përshëndetur kundër kandidatin e Ademit, Gramoz Vokrrin.
Megjithatë, faqja zyrtare e FFK-së ka reaguar duke thënë se këto lajme nuk janë të vërteta dhe nuk ka pasur asnjë sulm, por vetëm diskutim.
Reagimi i plotë:
Federata e Futbollit e Kosovës sqaron opinionin lidhur me raportimet e mediave për kinse sulm fizik të presidentit Agim Ademi ndaj njërit prej punëtorëve të administratës, Artan Govori brenda selisë së FFK-së. FFK edhe njëherë shpreh indinjatën e saj dhe detyrohet të përgënjeshtrojë raportimet e tilla të pavërteta. Në selinë e FFK-së nuk ka ndodhur kurrfarë sulmi fizik, siç raportohet në media, por thjesht ka qenë një debat i zakonshëm për natyrat e punës brenda federatës. Janë stafi i FFK-së dhe dëshmitarë tjerë, të cilët kanë qenë të pranishëm në momentet kur aludohet se ka pasur sulm fizik, e që në fakt ka qenë vetëm një debat. Raportimet e tilla janë në vazhdën e inskenimeve, presioneve e shantazheve që po bëhen nga persona që nuk kanë aspak të bëjnë me futbollin dhe që synojnë që nëpërmjet formave të tilla të vijnë deri te kapja e këtij institucioni. Sidoqoftë, FFK si institucion kredibil do të vazhdojë rrugëtimin e saj përkundër presioneve të tilla, me qëllimin e vetëm për progres të futbollit kosovar dhe që t’i mbajë larg këtij institucioni dhe larg futbollit njerëzit e grupeve të interesit.
