Konfirmimin se Kosovës i është pranuar aplikimi për anëtarësim në Këshillin e Evropës e bëri të ditur zëdhënësi i kësaj organizate ndërkombëtare, Daniel Holgten.
Më pas kjo nxiti reagime.
Përvec krerëve të Kosovës, reagime pati edhe jashtë kuftijve.
Shefi i ekzekutivit kosovar, Albin Kurti tha se anëtarësimi në KE, është mundësi për Kosovën që të ec përpara në të drejtat e njeriut.
“Anëtarësimi në Këshillin e Evropës është vlerë e shtuar për Këshillin dhe mundësi për Kosovën që të përparojë edhe më shumë në fushën e të drejtave të njeriut, demokracisë dhe sundimit të ligjit”, tha Kurti.
Edhe liderët e partive opozitare reaguan për këtë aplikim.
“E përshëndesim këtë nismë dhe si opozitë do ta mbështesim në të gjithë hapat e ardhshëm këtë proces, në mënyrë që kjo objektivë shtetërore e shoqërore të realizohet sa më parë”, tha kryetari i PDK-së, Memli Krasniqi.
“Si anëtarë të EPP-së, ne do të shfrytëzojmë të gjitha kanalet komunikuese tona në këtë drejtim. Prandaj sot, menjëherë pas aplikimit zyrtar, kam nisur një letër në drejtim të Presidentit të EPP Donald Tusk. Në këtë letër kam kërkuar mbështetjen e parezervë të familjes sonë evropiane për aplikmin e Kosovës; mbështetje e domosdoshme në Komitetin e Ministrave e në Asamblenë Parlamentare të Këshillit të Evropës”, tha kryetari i LDK-së, Lumir Abdixhiku.
“Si vend kemi ecur para drejt përmbushjes së kritereve të përcaktuara nga Bashkimi Evropian dhe kemi marrë notat më të larta në zbatimin e Marrëveshjes së Stabilizim Asocimit tash e sa vjet. Aplikimi sot i Kosovës në Këshillin e Evropës, është lajm i mirë për vendin”, kryetari i AAK-së, Ramush Haradinaj.
Teksa nismën e Kosovës për aplikim në KE e ka përshëndetur edhe kryeministri i Shqipërisë, Edi Rama.
Por Aplikimi i Kosovës për anëtarësim në Këshillin e Evropës nuk e ka pritur mirë presidenti serb, Aleksandër Vuçiq. Nga Beogradi, ai tha se me dorëzimin e kërkesës për anëtarësim, sipas tij Kosova ka shkelur marrëveshjen e Uashingtonit.
Raporti i gazetarit Besart Bejtullahu.
