Pas vendimit të presidentit amerikan, Donald Trump për vendosjen e tarifave të reja për të gjitha mallrat që hyjnë në SHBA, ka reaguar shefja e Komisonit Evropian Ursula von der Leyen e cila i ka quajtur ato një “goditje e madhe për ekonominë botërore”.
Reagime kanë pasur edhe një numër vendesh të tjera, duke përshirë Kinën, e cila ka shprehur kundërshtimin e saj ndaj masës dhe ka paralajmëruar se do të marrë “kundërmasa të vendosura” kundër SHBA.
Fjalët e tyre paralajmëruese vijnë pasi presidenti amerikan njoftoi një tarifë universale prej 10% për të gjitha importet në SHBA nga 5 prilli. Rreth 60 vende do të goditen gjithashtu me tarifa më të larta nga 9 prilli, ka raportuar BBC.
Trump ka thënë se masat janë shpagim për politikat e padrejta tregtare, dhe se ato do të përdoren për të nxitur prodhimin amerikan, duke thënë se masa do ta “bënte Amerikën përsëri të pasur”.
Por shefja e KE u zotua se Evropa do të marrë një qasje të unifikuar dhe paralajmëroi se Bashkimi Evropian – i cili do t’i nënshtrohet një tarife prej 20% – po përgatit kundërmasa në rast se negociatat dështojnë.
“Nëse merr njërin prej nesh, na merr të gjithëve”, tha ajo.
Giorgia Meloni e Italisë, një aleate e Trump, tha se vendimi ishte “i gabuar”, por se ajo do të punonte drejt një marrëveshjeje me SHBA-në për të “parandaluar një luftë tregtare”.
Homologu i saj spanjoll Pedro Sánchez tha se Spanja “do të vazhdojë të jetë e përkushtuar ndaj një bote të hapur”, ndërsa në Irlandë, drejtuesi i Taoise Micheál Martin tha se vendimi i Trump ishte “thellësisht për keqardhje” dhe nuk përfitoi “askush”.
Kurse, zëdhënësja e qeverisë franceze, Sophie Primas tha të enjten në mëngjes se Franca ishte “gati për këtë luftë tregtare”.
Presidenti në detyrë i Koresë së Jugut, Han Duck-soo tha se lufta tregtare globale “është bërë realitet” dhe qeveria e tij do të shikojë mënyra për të “kapërcyer krizën tregtare” pasi vendi i Azisë Lindore u godit me një normë prej 25%.
Japonia tha se taksa e saj prej 24% ishte “jashtëzakonisht për të ardhur keq” dhe mund të shkelte Organizatën Botërore të Tregtisë dhe marrëveshjet SHBA-Japoni, ndërsa Tajlanda tha se do të negocionte tarifën e saj prej 36%.
Udhëheqësit nga vendet që i nënshtrohen normës bazë 10% kanë reaguar gjithashtu ndaj masave të Trump, me Anthony Albanese të Australisë që tha se amerikanët do të përfundonin duke paguar çmimin më të madh për ato që ai i quajti “tarifa të pajustifikuara”.
Të enjten në mëngjes, kryeministri i Mbretërisë së Bashkuar Sir Keir Starmer përsëriti se ai do të “luftonte” për të siguruar një marrëveshje tregtare me SHBA-në për të zbutur goditjen e tarifave ndërsa bota hyn në “një epokë të re”.
Në Amerikën Latine, ekonomia e saj më e madhe, Brazili, miratoi një ligj në Kongres të mërkurën – Ligjin e Reciprocitetit Ekonomik – për të kundërshtuar tarifën 10% të vendosur nga Trump.
Menjëherë pas njoftimit të Trump, Sekretari amerikan i Thesarit Scott Bessent paralajmëroi vendet që të mos “hakmerren” dhe “të ulen duarkryq, ta pranojnë”.
“Sepse nëse hakmerreni, do të ketë përshkallëzim”, tha ai për Fox News.
