Pas një bllokade disa mujore, deputeti i Lëvizjes Vetëvendosje, Dimal Basha, u zgjodh kryetar i Kuvendit me 73 vota.
Kryetari i Partisë Demokratike të Kosovës, Memli Krasniqi, para gazetarëve deklaroi se PDK votoi për Bashën me qëllim që të zhbllokohej funksionimi i Kuvendit.
“Albin Kurti dhe Lëvizja Vetëvendosje e konsiderojnë se qytetarët e Kosovës më së miri i përfaqëson Dimal Basha. Në një situatë normale, në një botë paralele, ne kurrë nuk do ta votonim dikë si Dimali për kryetar të Kuvendit. Por sot kemi votuar ashtu siç kemi premtuar: për të zhbllokuar situatën, për të çarë bllokadën e Albin Kurtit dhe për të qëndruar besnikë ndaj fjalës së dhënë publikisht”, tha Krasniqi
Me zgjedhjen e Bashës në krye të Kuvendit u duk i pakënaqur kreu i Nismës Socialdemokrate, Fatmir Limaj.
“Unë, para së gjithash, pres një shpjegim pse vendi është vonuar kaq shumë muaj. Shpresoj që para qytetarëve të Kosovës do të japin një përgjigje përse është zvarritur procesi deri sot, për të ardhur këtu ku jemi”, u shpreh Limaj.
Nga ana tjetër, deputetja e AAK-së, Time Kadrijaj, e cilësoi Dimal Bashën si zgjedhjen më të mirë të mundshme nga Lëvizja Vetëvendosje.
“E pamë që pas gjashtë, gati shtatë muajsh ngërçi dhe bllokimi të konstituimit të Kuvendit, sot pati një zhvillim interesant: u votua një kandidat i propozuar nga Lëvizja Vetëvendosje për kryeparlamentar. Ky ishte kandidati më i mirë që kishte Vetëvendosja”, tha ajo.
Edhe Daut Haradinaj nga AAK e uroi Bashën për detyrën e re.
“Ne kemi pasur një votim të lirë si grup parlamentar. Unë personalisht ia dhashë votën dhe mendoj se u pa që e kanë seriozisht. Edhe i pyeta: ‘A e keni seriozisht që ky është kandidati më i preferuar i LVV-së?’ Më thanë po. Dhe kështu vepruam, votuam për të dhe ia uroj suksese”, tha Haradinaj
Ndërkohë, kryetari i LDK-së, Lumir Abdixhiku, përmes një postimi në Facebook tha, ndër të tjera, se me këtë zgjedhje “triumfoi injoranca”.
Kujtojmë se Dimal Basha ishte kandidati i pestë me radhë i propozuar nga Lëvizja Vetëvendosje për postin e kryetarit të Kuvendit.
